๓. อญฺญินฺทฺริยสุตฺตวณฺณนา

[๔๙๓] ตติเย อนญฺญาตญฺญสฺสามีตินฺทฺริยนฺติ "อนมตคฺเค สํสาเร อชานิตปุพฺพํ ธมฺมํ ชานิสฺสามี"ติ ปฏิปนฺนสฺส โสตาปตฺติมคฺคกฺขเณ อุปฺปนฺนอินฺทฺริยํ. อญฺญินฺทฺริยนฺติ เตสญฺเญว ญาตธมฺมานํ อาชานนากาเรน โสตาปตฺติผลาทีสุ ฉสุ ฐาเนสุ อุปฺปนฺนํ อินฺทฺริยํ. อญฺญาตาวินฺทฺริยนฺติ อญฺญาตาทีสุ อรหตฺตผเล ธมฺเมสุ อุปฺปนฺนํ อินฺทฺริยํ. ตตฺถ ตตฺถ เตน เตนากาเรน อุปฺปนฺนสฺส ญาณสฺเสเวตํ อธิวจนํ. อิทมฺปิ สุตฺตํ อตฺถุปฺปตฺติกเมว. สํฆมชฺฌสฺมึ หิ "กติ นุ โข โลกุตฺตรินฺทฺริยานี"ติ กถา อุทปาทิ, อถ ภควา ตานิ ทสฺเสนฺโต ตีณิมานิ ภิกฺขเว อินฺทฺริยานีติอาทิมาห.