อิทานิ ตมตฺถํ ปกาเสนฺโต ยสฺมึ อานนฺท สมเยติอาทิมาห. ตตฺถ สพฺพนิมิตฺตานนฺติ รูปนิมิตฺตาทีนํ. เอกจฺจานํ เวทนานนฺติ โลกิยานํ เวทนานํ. ตสฺมา ติหานนฺทาติ ยสฺมา อิมินา ผลสมาปตฺติวิหาเรน ผาสุ โหติ, ตสฺมา ตุเมฺหปิ ตทตฺถาย เอวํ วิหรถาติ ทสฺเสติ. อตฺตทีปาติ มหาสมุทฺทคตา ๓- ทีปํ วิย อตฺตานํ ทีปํ ปติฏฺฐํ กตฺวา วิหรถ. อตฺตสรณาติ อตฺตคติกา โหถ, มา อญฺญคติกา. ธมฺมทีปธมฺมสรณปเทสุปิ เอเสว นโย. เอตฺถ จ ธมฺโมติ นววิโธ โลกุตฺตรธมฺโม เวทิตพฺโพ. ตมตคฺเคติ ๔- ตมอคฺเค, มชฺเฌ ตกาโร ปทสนฺธิ วเสน วุตฺโต, อิทํ วุตฺตํ โหติ:- อิเม อคฺคตมาติ ตมตคฺคาติ. เอวํ ๕- สพฺพํ ตมโสตํ ฉินฺทิตฺวา อติวิย อคฺเค อุตฺตมภาเว เอเต อานนฺท มม ภิกฺขู ภวิสฺสนฺติ, เตสํ ๖- อคฺเค ภวิสฺสนฺติ. เยเกจิ สิกฺขากามา, สพฺเพสํ เตสํ จตุสติปฏฺฐานโคจรา จ ภิกฺขู อคฺเค ภวิสฺสนฺตีติ อรหตฺตกูเฏน เทสนํ คณฺหาตีติ.