๒. ทุติยวิหารสุตฺตวณฺณนา

[๑๒] ทุติเย ปฏิสลฺลานการณํ วุตฺตนเยเนว เวทิตพฺพํ, มิจฺฉาทิฏฺฐิวูปสมปจฺจยาติ มิจฺฉาทิฏฺฐิวูปสโม นาม สมฺมาทิฏฺฐิ. ตสฺมา ยํ สมฺมาทิฏฺฐิปจฺจยา เวทิตพฺพํ. อิมสฺมึ ปน สุตฺเต วิปากเวทนํ อติทูเรติ มญฺญมานา น คณฺหนฺตีติ วุตฺตํ. อิมินา นเยน สพฺพตฺถ อตฺโถ เวทิตพฺโพ. ยสฺส ยสฺส หิ วูปสมปจฺจยาติ วุจฺจติ, ตสฺส ตสฺส ปฏิปกฺขธมฺมปจฺจยาว ตนฺตํ เวทยิตํ อธิปฺเปตํ. ฉนฺทวูปสมปจฺจยาติอาทีสุ ปน ฉนฺทวูปสมปจฺจยา ตาว ปฐมชฺฌานเวทนา เวทิตพฺพา, วิตกฺกวูปสมปจฺจยา ทุติยชฺฌานเวทนา, สญฺญาปจฺจยา ฉ สมาปตฺติเวทนา, สญฺญาวูปสมปจฺจยา เนวสญฺญานาสญฺญายตนเวทนา. ฉนฺโท จ วูปสนฺโตติอาทีนิ วุตฺตตฺถาเนว.