เถโร ภิกฺขุสํเฆน สทฺธึ คนฺตฺวา ราชทฺวาเร อฏฺฐาสิ. รญฺโญ "เถรา เทว อาคตา"ติ นิเวทยึสุ, ๒- ราชา ลญฺชสฺส คหิตตฺตา น นิกฺขมิ. เถรา คนฺตฺวา สตฺถุ อาโรจยึสุ. สตฺถา สาริปุตฺตโมคฺคลฺลาเน เปเสสิ. ราชา เตสมฺปิ ทสฺสนมฺปิ น อทาสิ. เต อาคนฺตฺวา สตฺถุ อาโรจยึสุ "น ภนฺเต ราชา นิกฺขนฺโต"ติ. สตฺถา ตํขณํเยว พฺยากาสิ "อตฺตโน รชฺเช ฐตฺวา กาลํ กาตุํ น ลภิสฺสตี"ติ.

ทุติยทิวเส จ สามํเยว ภิกฺขุสํฆปริวาโร คนฺตฺวา ราชทฺวาเร อฏฺฐาสิ ราชา "สตฺถา อาคโต"ติ สุตฺวา นิกฺขมิตฺวา นิเวสนํ ปเวเสตฺวา สารปลฺลงฺเก นิสีทาเปตฺวา ยาคุขชฺชกํ อทาสิ. สตฺถา ปริภุตฺตยาคุขาทนีโย "ยาว ภตฺตํ นิฏฺฐาติ, ตาว สตฺถุ สนฺติเก นิสีทิสฺสามี"ติ อาคนฺตฺวา นิสินฺนํ ราชานํ "ตยา มหาราช อิทํ นาม กตนฺ"ติ อวตฺวา "การเณเนว นํ สญฺญาเปสฺสามี"ติ อิทํ อตีตการณํ อาหริ:- มหาราช ปพฺพชิเต นาม อญฺญมญฺญํ ยุชฺฌาเปตุํ น วฏฺฏติ. อตีเตปิ อิสโย อญฺญมญฺญํ ยุชฺฌาเปตฺวา สห รฏฺเฐน ราชา สมุทฺทํ ปวิฏฺโฐติ. กทา ภควาติ.

อตีเต มหาราช ภุรุรฏฺเฐ ภุรุราชา ๓- นาม รชฺชํ กาเรติ. ปญฺจสตา ปญฺจสตา เทฺว อิสิคณา ปพฺพตปาทโต โลณมฺพิลเสวนตฺถาย ภุรุนครํ คนฺตฺวา