9-10. Paṭhamavibhaṅgasuttādivaṇṇanā

[479-480] Navame satinepakkenāti ettha nipakkassa bhāvo nepakkaṃ, paññāyetaṃ nāmaṃ. Kasmā pana satibhājane paññā vuttāti? satiyā balavabhāvadassanatthaṃ. Balavasati hi idha adhippetā. Sā ca paññāsampayuttāva balavatī hoti, na vippayuttāti paññāsampayuttasatiṃ dassento evamāha. Cirakatanti ciraṃ kālaṃ kataṃ dānaṃ vā sīlaṃ vā uposathakammaṃ vā. Cirabhāsitanti "asukasmiṃ ṭhāne asukaṃ nāma bhāsitan"ti evaṃ cirakāle bhāsitaṃ. Vossaggārammaṇaṃ karitvāti nibbānārammaṇaṃ katvā. Udayatthagāminiyāti udayañca atthañca gacchantiyā, udayabbayapariggahikāyāti attho. Imasmiṃ sutte saddhāsatipaññindriyāni pubbabhāgāni, vīriyindriyamissakaṃ, samādhindriyaṃ nibbattitalokuttarameva kathitaṃ.