9. Kaṭṭhopamasuttavaṇṇanā

[509] Navame dvinnaṃ kaṭṭhānanti dvinnaṃ araṇīnaṃ. Saṃghaṭṭanasamodhānāti saṃghaṭṭanena ceva samodhānena ca. Usmāti usumākāro. Tejoti aggidhūmo. Ettha ca adharāraṇī viya vatthārammaṇaṃ, uttarāraṇī viya phasso, saṅghaṭṭo viya phassasaṅghaṭṭanaṃ, aggi viya vedanā daṭṭhabbā. Vatthārammaṇaṃ vā uttarāraṇī viya, phasso adharāraṇī viya daṭṭhabbo.