Iddhipādavibhaṅge pana "yo tathābhūtassa vedanākkhandho"tiādinā nayena imehi dhammehi samannāgato sesaarūpino dhammā iddhipādāti vuttā.

Apica ime hi tayo dhammā iddhīpi honti iddhipādāpi. Kathaṃ? chandaṃ Hi bhāvayato chando iddhi nāma hoti, samādhipadhānasaṅkhārā chandiddhipādo nāma. Samādhiṃ bhāventassa samādhi iddhi nāma hoti, chandappadhānasaṅkhārā samādhindriyā pādo nāma. Padhānasaṅkhāre bhāventassa padhānasaṅkhārā iddhi nāma hoti, chandasamādhi padhānasaṅkhāriddhiyā pādo nāma. Sampayuttadhammesu hi ekasmiṃ ijjhamāne sesāpi ijjhantiyeva.

Apica tesaṃ tesaṃ dhammānaṃ pubbabhāgavasenāpi etesaṃ iddhipādatā veditabbā. Paṭhamajjhānaṃ hi iddhi nāma, paṭhamajjhānassa pubbabhāgaparikammasampayuttā chandādayo iddhipādo nāma. Etenupāyena yāva nevasaññānāsaññāyatanā, iddhividhaṃ ādiṃ katvā yāva dibbacakkhuabhiññā, sotāpattimaggaṃ ādiṃ katvā yāva arahattamaggā nayo netabbo. Seliddhipādesupi eseva nayo.

Keci pana "anibbatto chando iddhipādo"ti vadanti. Idha tesaṃ vādamaddanatthāya abhidhamme uttaracūḷavāro nāma āgato;-