Itthikathāpi vaṇṇasaṇṭhānādīni paṭicca assādavasena vattuṃ na vaṭṭati, "saddhā pasannā khayaṃ gatā"ti evameva vaṭṭati. Sūrakathāpi "nandimitto nāma yodho sūro ahosī"ti assādavasena vattuṃ na vaṭṭati, "saddho pasanno ahosi, khayaṃ gato"ti evameva vaṭṭati. Surākathātipi pāṭho. Sāpi cesā surākathā "evarūpā nāma surā pītā ratijananī hotī"ti assādavaseneva na vaṭṭati, ādīnavavaseneva pana "ummattakasaṃvattanikā"tiādinā nayena vaṭṭati. Visikhākathāpi "asukavisikhā suniviṭṭhā dunniviṭṭhā"ti vā, "asukavisikhāya vāsino sūrā samatthā"ti vā assādavaseneva vattuṃ na vaṭṭati, "saddhā pasannā khayaṃ gatā"ti iccevaṃ vaṭṭati. Kumbhaṭṭhānakathāti kumbhaṭṭhānakathā udakatitthakathā vuccati, kumbhadāsikathā vā. Sāpi "pāsādikā naccituṃ gāyituṃ chekā"ti assādavasena na vaṭṭati, "saddhā pasannā"tiādinā nayeneva vaṭṭati.

Pubbapetakathāti atītañātikathā. Tattha vattamānañātikathāsadisova vinicchayo. Nānattakathāti purimapacchimakathāhi vimuttā avasesā nānāsabhāvā niratthakakathā. Lokakkhāyikāti "ayaṃ loko kena nimmito, asukena nāma nimmito, kāko

Samuddakkhāyikā nāma "kasmā samuddo sāgaro, sāgaradevena khatattā sāgaro, khato meti hatthamuddāya niveditattā samuddo"ti evamādikā niratthakasamuddakkhāyikakathā. Iti bhavo iti abhavoti yaṃ vā taṃ vā niratthakakāraṇaṃ vatvā pavattitakathā itibhavābhavakathā. Ettha ca bhavoti sassataṃ, abhavoti ucchedaṃ. Bhavoti vuḍḍhi, abhavoti hāni. Bhavoti kāmasukhaṃ, abhavoti attakilamatho. Iti imāya chabbidhāya itibhavābhavakathāya saddhiṃ bāttiṃsa tiracchānakathā nāma honti. Sesaṃ sabbattha uttānamevāti.

Paṭhamo vaggo.