2. Cakkavattisuttavaṇṇanā

[223] Dutiye rañño bhikkhave cakkavattissāti ettha attano sirisampattiyā rājati, catūhi vā saṅgahavatthūhi lokaṃ rañjetīti rājā, tassa rañño. "pavattatu bhavaṃ cakkaratanan"ti puññānubhāvena abbhuggatāya vācāya codento cakkaṃ vattetīti cakkavattī, tassa cakkavattissa. Pātubhāvāti pātubhāvena. Sattannanti gahaṇaparicchedo. Ratanānanti paricchinnaatthadassanaṃ. Vacanattho panettha ratijananaṭṭhena ratanaṃ. Apica:-

cittīkataṃ mahagghañca atulaṃ dullabhadassanaṃ

anomasattaparibhogaṃ ratanaṃ tena vuccatīti.