TIPITAKA Volume 19 : PALI ROMAN Sutta Pitaka Vol 11 : Sutta. Saṃ. Ma. Cakkavattivaggo pañcamo

[503] Sāvatthīnidānaṃ . ye hi keci bhikkhave atītamaddhānaṃ samaṇā vā brāhmaṇā vā tisso vidhā pajahiṃsu sabbe te sattannaṃ bojjhaṅgānaṃ bhāvitattā bahulīkatattā . ye hi keci bhikkhave anāgatamaddhānaṃ samaṇā vā brāhmaṇā vā tisso vidhā pajahissanti sabbe te sattannaṃ bojjhaṅgānaṃ bhāvitattā bahulīkatattā . ye hi keci bhikkhave etarahi samaṇā vā brāhmaṇā vā tisso vidhā pajahanti sabbe te sattannaṃ bojjhaṅgānaṃ bhāvitattā bahulīkatattā.