TIPITAKA Volume 19 : PALI ROMAN Sutta Pitaka Vol 11 : Sutta. Saṃ. Ma. Sarakānivaggo 1- tatiyo

[1507] Evamme sutaṃ ekaṃ samayaṃ bhagavā sakkesu viharati kapilavatthusmiṃ nigrodhārāme . atha kho mahānāmo sakko yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho mahānāmo sakko bhagavantaṃ etadavoca idaṃ bhante kapilavatthu iddhañceva phītañca bahujaññaṃ ākiṇṇamanussaṃ sambādhabyūhaṃ . so khvāhaṃ bhante bhagavantaṃ vā payirupāsitvā manobhāvanīye vā bhikkhū sāyaṇhasamayaṃ kapilavatthuṃ pavisanto vibbhantenapi 2- hatthinā samāgacchāmi vibbhantenapi assena samāgacchāmi vibbhantenapi rathena samāgacchāmi vibbhantenapi sakaṭena samāgacchāmi vibbhantenapi purisena samāgacchāmi . tassa mayhaṃ bhante tasmiṃ samaye mussateva bhagavantaṃ ārabbha sati mussati dhammaṃ ārabbha sati mussati saṅghaṃ ārabbha sati . tassa mayhaṃ bhante evaṃ hoti imamhi cāhaṃ samaye kālaṃ kareyyaṃ kā mayhaṃ gati ko abhisamparāyoti.