TIPITAKA Volume 19 : PALI ROMAN Sutta Pitaka Vol 11 : Sutta. Saṃ. Ma.

[1611] Cattārome bhikkhave puññābhisandā kusalābhisandā sukhassāhārā . katame cattāro . idha bhikkhave ariyasāvako buddhe aveccappasādena samannāgato hoti itipi so bhagavā .pe. satthā devamanussānaṃ buddho bhagavāti . ayaṃ paṭhamo puññābhisando kusalābhisando sukhassāhāro . puna caparaṃ bhikkhave ariyasāvako dhamme saṅghe . paññavā hoti udayatthagāminiyā paññāya samannāgato ariyāya nibbedhikāya sammādukkhayagāminiyā . ayaṃ catuttho puññābhisando kusalābhisando sukhassāhāro . ime kho bhikkhave cattāro puññābhisandā kusalābhisandā sukhassāhārā.