TIPITAKA Volume 19 : PALI ROMAN Sutta Pitaka Vol 11 : Sutta. Saṃ. Ma.

[1625] Ekaṃ samayaṃ bhagavā bārāṇasiyaṃ viharati isipatane migadāye. Atha kho dhammadinno upāsako pañcahi upāsakasatehi saddhiṃ yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . Ekamantaṃ nisinno kho dhammadinno upāsako bhagavantaṃ etadavoca ovadatu no bhante bhagavā anusāsatu no bhante bhagavā yaṃ amhākaṃ assa dīgharattaṃ hitāya sukhāyāti . tasmā tiha vo dhammadinnā evaṃ sikkhitabbaṃ ye te suttantā tathāgatabhāsitā gambhīrā gambhīratthā lokuttarā suññatapaṭisaṃyuttā te kālena kālaṃ upasampajja viharissāmāti. Evañhi vo dhammadinna sikkhitabbanti.