{๓๖๘-๓๖๙} อฏฺฐมสิกฺขาปเท ฯ นวํ ปน ภิกฺขุนา จีวรลาเภนาติ เอตฺถ อลภีติ ลโภ ลโภเอว ลาโภ ฯ กึ อลภิ ฯ จีวรํ ฯ กีทิสํ ฯ นวํ ฯ อิติ นวจีวรลาเภนาติ วตฺตพฺเพ อนุนาสิกโลปํ อกตฺวา นวํ จีวรลาเภนาติ วุตฺตํ ฯ ปฏิลทฺธนวจีวเรนาติ อตฺโถ ฯ มชฺเฌ ฐิตปททฺวเย ปนาติ นิปาโต ฯ ภิกฺขุนาติ เยน ลทฺธํ ตสฺส นิทสฺสนํ ฯ ปทภาชเน ปน พฺยญฺชนํ อนาทิยิตฺวา ยํ ลทฺธํ ตํ ทสฺเสตุํ จีวรํ นาม ฉนฺนํ จีวรานนฺติอาทิ วุตฺตํ ฯ จีวรนฺติ เจตฺถ ยํ นิวาเสตุํ วา ปารุปิตุํ วา สกฺกา โหติ ตเทว เวทิตพฺพํ ฯ เตเนว วิกปฺปนูปคํ ปจฺฉิมนฺติ น วุตฺตํ ฯ กํสนีลนฺติ จมฺมการนีลํ ฯ มหาปจฺจริยํ ปน อยมลํ โลหมลํ เอตํ กํสนีลํ นามาติ วุตฺตํ ฯ ปลาสนีลนฺติ โย โกจิ นีลวณฺโณ ปณฺณกรโส ฯ ทุพฺพณฺณกรณํ อาทาตพฺพนฺติ เอตํ กปฺปพินฺทุํ สนฺธาย วุตฺตํ ฯ น นีลาทีหิ สกลจีวรสฺส ทุพฺพณฺณกรณํ ฯ ตญฺจ ปน กปฺปํ อาทิยนฺเตน จีวรํ รชิตฺวา จตูสุ วา โกเณสุ ตีสุ วา ทฺวีสุ วา เอกสฺมึ วา โกเณ โมรสฺส อกฺขิมณฺฑลมตฺตํ วา มงฺกุณปิฏฺฐิมตฺตํ วา อาทาตพฺพํ ฯ มหาปจฺจริยํ ปเฏ วา คณฺฐิยํ วา น วฏฺฏตีติ วุตฺตํ ฯ มหาอฏฺฐกถายํ ปน วฏฺฏติเยวาติ วุตฺตํ ฯ ปาลิกปฺปกณฺณิกกปฺปาทโย ปน สพฺพตฺถ ปฏิสิทฺธา ตสฺมา ฐเปตฺวา เอกํ วฏฺฏพินฺทุํ อญฺเญน เกนจิปิ วิกาเรน กปฺโป น กาตพฺโพ ฯ {๓๗๑} อคฺคเฬติ อาทีสุ เอตานิ อคฺคฬาทีนิ กปฺปกตจีวเร ปจฺฉา อาโรเปตฺวา กปฺปกรณกิจฺจํ นตฺถิ ฯ เสสํ อุตฺตานเมว ฯ เอฬกโลมสมุฏฺฐานํ กิริยากิริยํ โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ ติจิตฺตํ ติเวทนนฺติ ฯ

ทุพฺพณฺณกรณสิกฺขาปทํ อฏฺฐมํ ฯ