{๔๒๘} ทสมสิกฺขาปเท ฯ ทิฏฺฐิคตํ อุปฺปนฺนนฺติ อริฏฺฐสฺส วิย เอตสฺสาปิ อโยนิโส อุมฺมชฺชนฺตสฺส อุปฺปนฺนํ ทิฏฺฐิคตํ ฯ นาเสตูติ เอตฺถ ติวิธา นาสนา สํวาสนาสนา ลิงฺคนาสนา ทณฺฑกมฺมนาสนาติ ฯ ตตฺถ อาปตฺติยา อทสฺสนาทีสุ อุกฺเขปนา สํวาสนาสนา นาม ฯ ทูสโก นาเสตพฺโพ เมตฺติยํ ภิกฺขุนึ นาเสถาติ อยํ ลิงฺคนาสนา นาม ฯ อชฺชตคฺเค เต อาวุโส สมณุทฺเทส น เจว โส ภควา สตฺถา อปทิสิตพฺโพติ อยํ ทณฺฑกมฺมนาสนา นาม ฯ อยํ อิธ อธิปฺเปตา ฯ เตนาห เอวญฺจ ปน ภิกฺขเว นาเสตพฺโพ ฯเปฯ จร ปิเร วินสฺสาติ ฯ ตตฺถ จราติ คจฺฉ ฯ ปิเรติ ปร อมามก ฯ วินสฺสาติ นสฺส ยตฺถ น เต ปสฺสาม ตตฺถ คจฺฉาติ ฯ

{๔๒๙} อุปลาเปยฺยาติ สงฺคณฺเหยฺย ฯ อุปฏฺฐาเปยฺยาติ เตน อตฺตโน อุปฏฺฐานํ การาเปยฺย ฯ เสสํ อริฏฺฐสิกฺขาปเท วุตฺตนเยเนว เวทิตพฺพํ สทฺธึ สมุฏฺฐานาทีหีติ ฯ

กณฺฐกสิกฺขาปทํ ๑- ทสมํ ฯ

สมตฺโต วณฺณนากฺกเมน สปฺปาณกวคฺโค สตฺตโม ฯ