{๕๕๒} เตน สมเยนาติ เทฺวภาคสิกฺขาปทํ ฯ ตตฺถ อนฺเต อาทิยิตฺวาติ สนฺถตสฺส อนฺเต อนุวาตํ วิย ทสนฺเต โอทาตานํ อลฺลิยาเปตฺวา ฯ เทฺว ภาคาติ เทฺว โกฏฺฐาสา ฯ อาทาตพฺพาติ คเหตพฺพา ฯ โคจริยานนฺติ กปิลวณฺณานํ ฯ เทฺว ตุลา อาทาตพฺพาติ จตูหิ ตุลาหิ กาเรตุกามํ สนฺธาย วุตฺตํ ฯ อตฺถโต ปน ยตฺตเกหิ เอฬกโลเมหิ กาตุกาโม โหติ เตสุ เทฺว โกฏฺฐาสา กาฬกานํ เอโก โอทาตานํ เอโก โคจริยานนฺติ อิทเมว ทสฺสิตํ โหตีติ เวทิตพฺพํ ฯ เสสํ อุตฺตานตฺถเมว ฯ สมุฏฺฐานาทีนิปิ โกสิยสิกฺขาปทสทิสาเนว ฯ เกวลํ อิทํ อาทาย อนาทาย จ กรณโต กิริยากิริยํ เวทิตพฺพนฺติ ฯ

เทฺวภาคสิกฺขาปทวณฺณนา นิฏฺฐิตา ฯ