{๔๗๑} เตน สมเยน พุทฺโธ ภควาติ อุทฺโทสิตสิกฺขาปทํ ฯ ตตฺถ สนฺตรุตฺตเรนาติ อนฺตรนฺติ อนฺตรวาสโก วุจฺจติ ฯ อุตฺตรนฺติ อุตฺตราสงฺโค ฯ สห อนฺตเรน อุตฺตรํ สนฺตรุตฺตรํ ฯ เตน สนฺตรุตฺตเรน ฯ สห อนฺตรวาสเกน อุตฺตราสงฺเคนาติ อตฺโถ ฯ กณฺณกิตานีติ เสเทน ผุฏฺโฐกาเสสุ สญฺชาตกาฬเสตมณฺฑลานิ ฯ อทฺทสา โข อายสฺมา อานนฺโท เสนาสนจาริกํ อาหิณฺฑนฺโตติ เถโร กิร ภควติ ทิวาปฏิสลฺลานตฺถาย คนฺธกุฏึ ปวิฏฺเฐ ตํ โอกาสํ ลภิตฺวา ทุนฺนิกฺขิตฺตานิ ทารุภณฺฑมตฺติกาภณฺฑานิ ปฏิสาเมนฺโต อสมฺมฏฺฐฏฺฐานํ สมฺมชฺชนฺโต คิลาเนหิ ภิกฺขูหิ สทฺธึ ปฏิสนฺถารํ กโรนฺโต เตสํ ภิกฺขูนํ เสนาสนฏฺฐานํ สมฺปตฺโต อทฺทส ฯ เตน วุตฺตํ อทฺทสา โข อายสฺมา อานนฺโท เสนาสนจาริกํ อาหิณฺฑนฺโตติ ฯ

{๔๗๓} อวิปฺปวาสสมฺมตึ ทาตุนฺติ อวิปฺปวาเส สมฺมติ อวิปฺปวาสสมฺมติ ฯ อวิปฺปวาสาย วา สมฺมติ อวิปฺปวาสสมฺมติ ฯ โก ปเนตฺถ อานิสํโส ฯ เยน จีวเรน วิปฺปวสติ ตํ นิสฺสคฺคิยํ น โหติ อาปตฺติญฺจ น อาปชฺชติ ฯ กิตฺตกํ กาลํ ฯ มหาสุมตฺเถโร ตาว อาห ยาว โรโค น วูปสมติ วูปสนฺเต ปน โรเค สีฆํ จีวรฏฺฐานํ อาคนฺตพฺพนฺติ ฯ มหาปทุมตฺเถโร อาห สีฆํ อาคจฺฉโต โรโค ปฏิกุปฺเปยฺย ตสฺมา สณิกํ อาคนฺตพฺพํ ยโต ปฏฺฐาย หิ สตฺถํ วา ปริเยสติ คจฺฉามีติ อาโภคํ วา กโรติ ตโต ปฏฺฐาย วฏฺฏติ น ทานิ คมิสฺสามีติ เอวํ ปน ธุรนิกฺเขปํ กโรนฺเตน ปจฺจุทฺธริตพฺพํ อติเรกจีวรฏฺฐาเน ฐสฺสตีติ ฯ สเจ ปนสฺส โรโค ปฏิกุปฺปติ กึ กาตพฺพนฺติ ฯ ปุสฺสเทวตฺเถโร ตาว อาห สเจ โสเยว โรโค ปฏิกุปฺปติ สาเอว สมฺมติ ปุน สมฺมติทานกิจฺจํ นตฺถิ อถญฺโญ กุปฺปติ ปุน ทาตพฺพา สมฺมตีติ ฯ อุปติสฺสตฺเถโร อาห โส วา โรโค โหตุ อญฺโญ วา ปุน สมฺมติทานกิจฺจํ นตฺถีติ ฯ

{๔๗๕-๔๗๖} นิฏฺฐิตจีวรสฺมึ ภิกฺขุนาติ อิธ ปน ปุริมสิกฺขาปเท วิย อตฺถํ อคฺคเหตฺวา นิฏฺฐิเต จีวรสฺมึ ภิกฺขุโนติ เอวํ สามิวเสน กรณวจนสฺส อตฺโถ เวทิตพฺโพ ฯ กรณวเสน หิ ภิกฺขุนา อิทํ นาม กาตพฺพนฺติ นตฺถิ สามิวเสน ปน ภิกฺขุโน จีวรสฺมึ นิฏฺฐิเต กฐิเน จ อุพฺภเต เอวํ ฉินฺนปลิโพโธ เอกรตฺตมฺปิ เจ ภิกฺขุ ติจีวเรน วิปฺปวเสยฺยาติ เอวํ อตฺโถ ยุชฺชติ ฯ ตตฺถ ติจีวเรนาติ อธิฏฺฐิเตสุ ตีสุ จีวเรสุ เยนเกนจิ ฯ เอเกน วิปฺปวุฏฺโฐปิ หิ ติจีวเรน วิปฺปวุฏฺโฐ โหติ ปฏิสิทฺธปริยาปนฺเนน วิปฺปวุฏฺฐตฺตา ฯ เตเนวสฺส ปทภาชเน สงฺฆาฏิยา วาติ อาทิ วุตฺตํ ฯ วิปฺปวเสยฺยาติ วิปฺปวุฏฺโฐ วเสยฺย ฯ