{๙๔} ทุติยสิกฺขาปเท ฯ อนาจารํ อาจริตฺวาติ อกาตพฺพํ กตฺวา ฯ กายวจีทฺวาเรสุ อาปตฺตึ อาปชฺชิตฺวาติ วุตฺตํ โหติ ฯ อญฺเญนญฺญํ ปฏิจรตีติ อญฺเญน วจเนน อญฺญํ วจนํ ปฏิจรติ ปฏิจฺฉาเทติ อชฺโฌตฺถรติ ฯ อิทานิ ตํ ปฏิจรณวิธึ ทสฺเสนฺโต โก อาปนฺโนติ อาทิมาห ฯ ตตฺรายํ วจนสมฺพนฺโธ ฯ โส กิร กิญฺจิ วีติกฺกมํ ทิสฺวา อาวุโส ตฺวํ อาปตฺตึ อาปนฺโนสีติ สงฺฆมชฺเฌ อาปตฺติยา อนุยุญฺชิยมาโน โก อาปนฺโนติ วทติ ฯ ตโต ตฺวนฺติ วุตฺเต อหํ กึ อาปนฺโนติ วทติ ฯ อถ ปาจิตฺติยํ วา ทุกฺกฏํ วาติ วุตฺเต วตฺถุํ ปุจฺฉนฺโต อหํ กิสฺมึ อาปนฺโนติ วทติ ฯ ตโต อสุกสฺมินฺติ วุตฺเต อหํ กถํ อาปนฺโน กึ กโรนฺโต จ อาปนฺโนมฺหีติ ปุจฺฉติ ฯ อถ อิทํ นาม กโรนฺโต อาปนฺโนติ วุตฺเต กํ ภณถาติ วทติ ฯ ตโต ตํ ภณามาติ วุตฺเต กึ ภณถาติ วทติ ฯ อปิเจตฺถ อยํ ปาลิมุตฺตโกปิ อญฺเญนญฺญํ ปฏิจรณวิธิ ฯ ภิกฺขูหิ ตว สิปาฏิกาย กหาปโณ ทิฏฺโฐ กิสฺเสวมสารุปฺปํ กโรสีติ วุตฺโต สุทฏฺฐํ ภนฺเต น ปเนโส กหาปโณ ติปุมณฺฑลํ เอตนฺติ ภณนฺโต วา ตฺวํ สุรํ ปิวนฺโต ทิฏฺโฐ กิสฺเสวมสารุปฺปํ กโรสีติ วุตฺโต สุทิฏฺโฐ ภนฺเต น ปเนสา สุรา เภสชฺชตฺถาย สมฺปาทิตํ อริฏฺฐนฺติ ภณนฺโต วา ตฺวํ ปฏิจฺฉนฺเน อาสเน มาตุคาเมน สทฺธึ นิสินฺโน ทิฏฺโฐ กิสฺเสวมสารุปฺปํ กโรสีติ วุตฺโต เยน ทิฏฺฐํ สุทิฏฺฐํ วิญฺญู ปเนตฺถ ทุติโย อตฺถิ โส กิสฺส น ทิฏฺโฐติ ภณนฺโต วา อีทิสํ ตยา กิญฺจิ ทิฏฺฐนฺติ ปุฏฺโฐ น สุณามีติ โสตมุปเนนฺโต วา โสตทฺวาเร ปุจฺฉนฺตานํ จกฺขุํ อุปเนนฺโต วา อญฺเญนญฺญํ ปฏิจรตีติ เวทิตพฺโพ ฯ {๙๘} อญฺญวาทเก วิเหสเก ปาจิตฺติยนฺติ เอตฺถ อญฺญํ วทตีติ อญฺญวาทกํ ฯ อญฺเญนญฺญํ ปฏิจรณสฺเสตํ นามํ ฯ วิเหสตีติ วิเหสกํ ฯ ตุณฺหีภูตสฺเสตํ นามํ ฯ ตสฺมึ อญฺญวาทเก วิเหสเก ฯ ปาจิตฺติยนฺติ วตฺถุทฺวเย ปาจิตฺติยทฺวยํ วุตฺตํ ฯ อญฺญวาทกํ โรเปตูติ อญฺญวาทกํ อาโรเปตุ ปติฏฺฐาเปตูติ อตฺโถ ฯ วิเหสกํ โรเปตูติ เอตสฺมึปิ เอเสว นโย ฯ {๑๐๐} อโรปิเต อญฺญวาทเกติ กมฺมวาจาย อนาโรปิเต อญฺญวาทเก ฯ อโรปิเต วิเหสเกติ เอตสฺมิมฺปิ เอเสว นโย ฯ {๑๐๑} ธมฺมกมฺเม ธมฺมกมฺมสญฺญีติ อาทีสุ ยนฺตํ อญฺญวาทกวิเหสกโรปนกมฺมํ กตํ ตญฺเจ ธมฺมกมฺมํ โหติ โส จ ภิกฺขุ ตสฺมึ ธมฺมกมฺมสญฺญี อญฺญวาทกญฺจ วิเหสกญฺจ กโรติ อถสฺส ตสฺมึ อญฺญวาทเก จ วิเหสเก จ อาปตฺติ ปาจิตฺติยสฺสาติ อิมินา นเยน อตฺโถ เวทิตพฺโพ ฯ