{๑๑๒} จิมิลิกํ วาติ อาทีสุ จิมิลิกา นาม สุธาทิปริกมฺมกตาย ภูมิยา วณฺณานุรกฺขณตฺถํ กตา โหติ ฯ ตํ เหฏฺฐา ปตฺถริตฺวา อุปริ กฏสารกํ ปตฺถรนฺติ ฯ อุตฺตรตฺถรณํ นาม มญฺจปีฐานํ อุปริ อตฺถริตพฺพกํ ปจฺจตฺถรณํ ฯ ภุมฺมตฺถรณํ นาม ภูมิยํ อตฺถริตพฺพา กฏสารกาทิวิกติ ฯ ตฏฺฏิกํ นาม ตาลปณฺเณหิ วา วาเกหิ วา กตา ตฏฺฏิกา ฯ จมฺมขณฺฑนฺนาม สีหพฺยคฺฆทีปิอจฺฉตรจฺฉจมฺมาทีสุปิ ยงฺกิญฺจิ จมฺมํ ฯ อฏฺฐกถาสุ หิ เสนาสนปริโภเค ปฏิกฺขิตฺตจมฺมํ นาม น ทิสฺสติ ฯ ตสฺมา สีหจมฺมาทีนํ ปริหรเณเยว ปฏิกฺเขโป เวทิตพฺโพ ฯ ปาทปุญฺฉนี นาม รชฺชุเกหิ วา ปริโลติกาหิ วา ปาทปุญฺฉนตฺถํ กตา ฯ ผลกปีฐํ นาม ผลกมยํ ปีฐํ ฯ อถวา ผลกญฺเจว ทารุมยปีฐญฺจ ฯ เอเตน สพฺพํปิ ทารุภณฺฑาทิ สงฺคหิตํ ฯ มหาปจฺจริยํ ปน วิตฺถาเรเนว วุตฺตํ อาธารกํ ปตฺตปิธานํ ปาทกฐลิกํ ตาลปณฺณํ วีชนีปตฺตกํ ยงฺกิญฺจิ ทารุภณฺฑํ อนฺตมโส ปานียอุฬุงฺกํ ปานียสงฺขํ อชฺโฌกาเส นิกฺขิปิตฺวา คจฺฉนฺตสฺส ทุกฺกฏนฺติ ฯ มหาอฏฺฐกถายํ ปน เอส นโย ทุติยสิกฺขาปเท ทสฺสิโต ฯ อชฺโฌกาเส รชนํ ปจิตฺวา รชนภาชนํ รชนอุฬุงฺโก รชนโทณิกาติ สพฺพํ อคฺคิสาลายํ ปฏิสาเมตพฺพํ ฯ สเจ อคฺคิสาลา นตฺถิ อโนวสฺสเก ปพฺภาเร นิกฺขิปิตพฺพํ ฯ ตสฺมึปิ อสติ ยตฺถ โอโลเกนฺโต ภิกฺขู ปสฺสนฺติ ตาทิเส ฐาเน ฐเปตฺวาปิ คนฺตุํ วฏฺฏติ ฯ อญฺญสฺส ปุคฺคลิเกติ ยสฺมึ วิสฺสาสคฺคาโห น รุหติ ตสฺส สนฺตเก ทุกฺกฏํ ยสฺมึ ปน วิสฺสาโส รุหติ ตสฺส สนฺตกํ อตฺตโน ปุคฺคลิกมิว โหตีติ มหาปจฺจริยาทีสุ วุตฺตํ ฯ {๑๑๓} อาปุจฺฉํ คจฺฉตีติ โย ภิกฺขุ วา สามเณโร วา อารามิโก วา ลชฺชี โหติ อตฺตโน ปลิโพธํ วิย มญฺญติ โย ตถารูปํ อาปุจฺฉิตฺวา คจฺฉติ ตสฺส อนาปตฺติ ฯ โอตาเปนฺโต คจฺฉตีติ อาตเป โอตาเปนฺโต อาคนฺตฺวา อุทฺธริสฺสามีติ คจฺฉติ ฯ เอวํ คจฺฉโต อนาปตฺติ ฯ เกนจิ ปลิพุทฺธํ โหตีติ เสนาสนํ เกนจิ อุปทฺทูตํ โหตีติ อตฺโถ ฯ สเจปิ หิ วุฑฺฒตโร ภิกฺขุ อุฏฺฐาเปตฺวาว คณฺหาติ สเจปิ ยกฺโข วา เปโต วา อาคนฺตฺวา นิสีทติ โกจิ วา อิสฺสโร อาคนฺตฺวา คณฺหาติ เสนาสนํ ปลิพุทฺธํ โหติ ฯ สีหพฺยคฺฆาทีสุ วา ปน ตํ ปเทสํ อาคนฺตฺวา ฐิเตสุปิ เสนาสนํ ปลิพุทฺธํ โหติเยว ฯ เอวํ เกนจิ ปลิพุทฺเธน อนุทฺธริตฺวาปิ คจฺฉโต อนาปตฺติ ฯ อาปทาสูติ ชีวิตพฺรหฺมจริยนฺตราเยสุ ฯ เสสํ อุตฺตานเมวาติ ฯ