อุภยานิ โข ปนสฺสาติ อาทิ ปน ยสฺมา อญฺญสฺมึ สกเล นวงฺเคปิ พาหุสจฺเจ สติ สอฏฺฐกถํ วินยปิฏกํ วินา น วฏฺฏติเยว ตสฺมา วิสุํ วุตฺตํ ฯ ตตฺถ วิตฺถาเรนาติ อุภโตวิภงฺเคน สทฺธึ ฯ สฺวาคตานีติ สุฏฺฐุ อาคตานิ ฯ ยถา อาคตานิ ปน สฺวาคตานิ โหนฺติ ตํ ทสฺเสตุํ สุวิภตฺตานีติอาทิ วุตฺตํ ฯ ตตฺถ สุวิภตฺตานีติ สุฏฺฐุ วิภตฺตานิ ปทปจฺฉาภฏฺฐสงฺกรโทสวิรหิตานิ ฯ สุปฺปวตฺตีนีติ ปคุณานิ วาจุคฺคตานิ ฯ สุวินิจฺฉิตานิ สุตฺตโสติ ขนฺธกปริวารโต อาหริตพฺพสุตฺตวเสน สุฏฺฐุ วินิจฺฉิตานิ ฯ อนุพฺยญฺชนโสติ อกฺขรปทปาริปูริยา จ สุวินิจฺฉิตานิ อขณฺฑานิ อวิปรีตกฺขรานิ ฯ เอเตน อฏฺฐกถา ทีปิตา ฯ อฏฺฐกถาโต หิ เอส วินิจฺฉโย โหติ ฯ กลฺยาณวาโจติ สิถิลธนิตาทีนํ ยถาวิธานวจเนน ปริมณฺฑลปทพฺยญฺชนาย โปริยา วาจาย สมนฺนาคโต วิสฺสฏฺฐาย อเนลคลาย อตฺถสฺส วิญฺญาปนิยา ฯ กลฺยาณวากฺกรโณติ มธุรสฺสโร ฯ มาตุคาโม หิ สรสมฺปตฺติรโต ตสฺมา ปริมณฺฑลปทพฺยญฺชนมฺปิ วจนํ สรสมฺปตฺติรหิตํ หีเฬติ ฯ เยภุยฺเยน ภิกฺขุนีนํ ปิโย โหติ มนาโปติ สพฺพาสํ ปิโย นาม ทุลฺลโล ฯ พหุสฺสุตานํ ปน ปณฺฑิตานํ ภิกฺขุนีนํ สีลาจารสมฺปตฺตียา ปิโย โหติ มนวฑฺฒนโก ฯ ปฏิพโล โหติ ภิกฺขุนิโย โอวทิตุนฺติ สุตฺตญฺจ การณญฺจ ทสฺเสนฺโต วฏฺฏภเยน ตชฺเชตฺวา ภิกฺขุนิโย โอวทิตุํ ตาสํ ธมฺมํ เทเสตุํ สมตฺโถ โหติ ฯ กาสายวตฺถวสนายาติ กาสายวตฺถนิวตฺถาย ฯ ครุธมฺมนฺติ คิหิกาเล ภิกฺขุนิยา กายสํสคฺคํ วา สิกฺขมานาสามเณรีสุ เมถุนธมฺมํ วา อนชฺฌาปนฺนปุพฺโพ โหติ ฯ มาตุคาโม หิ ปุพฺเพ กตมนุสฺสรนฺโต สํวเร ฐิตสฺสาปิ ธมฺมเทสนาย คารวํ น กโรติ ฯ อถวา ตสฺมึเยว อสทฺธมฺเม จิตฺตํ อุปฺปาเทติ ฯ วีสติวสฺโส วาติ อุปสมฺปทาย วีสติวสฺโส ตโต อติเรกวีสติวสฺโส วา ฯ เอวรูเปหิ วิสภาเคหิ วตฺถูหิ ปุนปฺปุนํ สมาคจฺฉนฺโตปิ ทหโร วิย สหสา สีลวินาสํ น สมฺปาปุณาติ ฯ อตฺตโน วยํ ปจฺจเวกฺขิตฺวา อยุตฺตฏฺฐาเน ฉนฺทราคํ วิเนตุํ ปฏิพโล โหติ ฯ เตน วุตฺตํ วีสติวสฺโส วา โหติ อติเรกวีสติวสฺโส วาติ ฯ เอตฺถ จ สีลวาติ อาทิ เอกมงฺคํ พหุสฺสุโตติ อาทิ ทุติยํ อุภยานิ โข ปนสฺสาติ อาทิ ตติยํ กลฺยาณวาโจ โหติ กลฺยาณวากฺกรโณติ จตุตฺถํ เยภุยฺเยน ภิกฺขุนีนํ ปิโย โหติ มนาโปติ ปญฺจมํ ปฏิพโล โหติ ภิกฺขุนิโย โอวทิตุนฺติ ฉฏฺฐํ น โข ปเนตนฺติอาทิ สตฺตมํ วีสติวสฺโสติอาทิ อฏฺฐมนฺติ เวทิตพฺพํ ฯ {๑๔๘} ญตฺติจตุตฺเถนาติ ปุพฺเพ วตฺถุสฺมึ วุตฺตนเยเนว ฯ