มานตฺตจรณญฺจ อุปสมฺปทปริเยสนา จ ยถาฐาเนเยว อาวิภวิสฺสติ ฯ น ภิกฺขุนิยา เกนจิ ปริยาเยนาติ ทสหิ วา อกฺโกสวตฺถูหิ อญฺเญน วา เกนจิ ปริยาเยน ภิกฺขุ เนว อกฺโกสิตพฺโพ น ปริภาสิตพฺโพ น จ ภเยน ตชฺเชตพฺโพ ฯ โอวโฏติ ปิหิโต วาริโต ปฏิกฺขิตฺโต ฯ วจนํเยว วจนปโถ ฯ อโนวโฏติ อปิหิโต อวาริโต อปฏิกฺขิตฺโต ฯ ตสฺมา ภิกฺขุนิยา อธิปจฺจฏฺฐาเน เชฏฺฐกฏฺฐาเน ฐตฺวา เอวํ อภิกฺกม เอวํ ปฏิกฺกม เอวํ นิวาเสหิ เอวํ ปารุปาหีติ เกนจิ ปริยาเยน เนว ภิกฺขุ โอวทิตพฺโพ น อนุสาสิตพฺโพ ฯ โทสํ ปน ทิสฺวา ปุพฺเพ มหาเถรา เอวํ น อภิกฺกมนฺติ น ปฏิกฺกมนฺติ น นิวาเสนฺติ น ปารุปนฺติ อีทิสํ กาสาวํปิ น ธาเรนฺติ น เอวํ อกฺขีนิ อญฺเชนฺตีติอาทินา นเยน วิชฺชมานโทสํ ทสฺเสตุํ วฏฺฏติ ฯ ภิกฺขูหิ ปน อยํ วุฑฺฒสมณี เอวํ นิวาเสติ เอวํ ปารุปติ มา เอวํ นิวาเสหิ มา เอวํ ปารุปาหิ มา ติลกกมฺมปณฺณกมฺมาทีนิ กโรหีติ ยถาสุขํ ภิกฺขุนึ โอวทิตุํ อนุสาสิตุํ วฏฺฏติ ฯ

สมคฺคมฺหยฺยาติ ภณนฺตนฺติ สมคฺคา อมฺหา อยฺยา อิติ ภณนฺตํ ภิกฺขุนีสงฺฆํ ฯ อญฺญํ ธมฺมํ ภณตีติ อญฺญํ สุตฺตํ วา อภิธมฺมํ วา ฯ สมคฺคมฺหยฺยาติ วจเนน หิ โอวาทํ ปจฺจาสึสนฺติ ฯ ตสฺมา ฐเปตฺวา โอวาทํ อญฺญํ ธมฺมํ ภณนฺตสฺส ทุกฺกฏํ ฯ โอวาทํ อนิยฺยาเทตฺวาติ เอส ภคินิโย โอวาโทติ อวตฺวา ฯ {๑๕๐} อธมฺมกมฺเมติ อาทีสุ ภิกฺขุโนวาทกสมฺมติกมฺมํ กมฺมนฺติ เวทิตพฺพํ ฯ ตตฺถ อธมฺมกมฺเม ทฺวินฺนํ นวกานํ วเสน อฏฺฐารส ปาจิตฺติยานิ ฯ ธมฺมกมฺเม ทุติยสฺส นวกสฺส อวสานปเท อนาปตฺติ ฯ เสเสสุ สตฺตรส ทุกฺกฏานิ ฯ {๑๕๒} อุทฺเทสํ เทนฺโตติ อฏฺฐนฺนํ ครุธมฺมานํ ปาลึ อุทฺทิสนฺโต ฯ ปริปุจฺฉํ เทนฺโตติ ตสฺสาเยว ปคุณาย ครุธมฺมปาลิยา อฏฺฐกถํ ภณนฺโตติ อตฺโถ ฯ โอสาเรหิ อยฺยาติ วุจฺจมาโน โอสาเรตีติ เอวํ วุจฺจมาโน อฏฺฐครุธมฺมปาลึ โอสาเรตีติ อตฺโถ ฯ เอวํ อุทฺเทสํ เทนฺโต ปริปุจฺฉํ เทนฺโต โย จ โอสาเรหีติ วุจฺจมาโน อฏฺฐครุธมฺมํ ภณติ ตสฺส ปาจิตฺติเยน อนาปตฺติ ฯ อญฺญํ ธมฺมํ ภณนฺตสฺส ทุกฺกเฏน อนาปตฺติ ฯ ปญฺหํ ปุจฺฉติ ปญฺหํ ปุฏฺโฐ กเถตีติ ภิกฺขุนี ครุธมฺมนิสฺสิตํ วา ขนฺธาทินิสฺสิตํ วา ปญฺหํ ปุจฺฉติ ฯ ตํ โย ภิกฺขุ กเถติ ตสฺสาปิ อนาปตฺติ ฯ อญฺญสฺสตฺถาย ภณนฺตนฺติ จตุปฺปริสาย ธมฺมํ เทเสนฺตํ ภิกฺขุํ อุปสงฺกมิตฺวา ภิกฺขุนิโย สุณนฺติ ฯ ตตฺราปิ ภิกฺขุสฺส อนาปตฺติ ฯ สิกฺขมานาย สามเณริยาติ เอตาสํ เทเสนฺตสฺสาปิ อนาปตฺติ ฯ เสสํ อุตฺตานตฺถเมว ฯ