อฑฺฒโยชเน อฑฺฒโยชเนติ เอกเมกํ อฑฺฒโยชนํ อติกฺกมนฺตสฺส อิทานิ อติกฺกมิสฺสามีติ ปฐมปเท ทุกฺกฏํ ทุติยปเท ปาจิตฺติยํ ฯ อิมสฺมึ หิ นเย อติกฺกมเน อาปตฺติ โอกฺกมเน อนาปตฺติ ฯ ภิกฺขุ สํวิทหตีติ นครทฺวาเร วา รถิกาย วา ภิกฺขุนึ ทิสฺวา อสุกํ คามนฺนาม คตปุพฺพตฺถาติ วทติ ฯ นมฺหิ อยฺยา คตปพฺพาติ ฯ เอหิ คจฺฉามาติ วา เสฺว อหํ คมิสฺสามิ ตฺวํปิ อาคจฺเฉยฺยาสีติ วา วทติ ฯ ภิกฺขุนี สํวิทหตีติ คามนฺตเร เจติยวนฺทนตฺถํ คามโต นิกฺขมนฺตํ ภิกฺขุํ ทิสฺวา อยฺยา กุหึ คจฺฉถาติ วทติ ฯ อสุกํ คามํ เจติยวนฺทนตฺถนฺติ ฯ อหํปิ อยฺยา คจฺฉามีติ เอวํปิ ภิกฺขุนีเยว สํวิทหติ น ภิกฺขุ ฯ วิสํเกเตนาติ เอตฺถ ปุเรภตฺตํ คมิสฺสามาติ วตฺวา ปจฺฉาภตฺตํ คจฺฉนฺติ อชฺช อาคจฺฉิสฺสามาติ วตฺวา เสฺว คจฺฉนฺติ เอวํ กาลวิสํเกเตเยว อนาปตฺติ ฯ ทฺวารวิสํเกเต ปน มคฺควิสํเกเต วา สติปิ อาปตฺติเยว ฯ อาปทาสูติ รฏฺฐเภเท จกฺกสมารุฬฺหา ชนปทา ปริยายนฺติ เอวรูปาสุ อาปทาสุ อนาปตฺติ ฯ เสสํ อุตฺตานเมวาติ ฯ จตุสฺสมุฏฺฐานํ กายโต กายวาจโต กายจิตฺตโต กายวาจาจิตฺตโต จ สมุฏฺฐาติ กิริยา โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ

สํวิธานสิกฺขาปทํ สตฺตมํ ฯ