{๒๐๙} ทุติยสิกฺขาปเท ฯ ปริหีนลาภสกฺกาโรติ โส กิร อชาตสตฺตุนา ราชานํ มาราเปตฺวาปิ อภิมาเร โยเชตฺวาปิ รุหิรุปฺปาทํ กตฺวาปิ คุฬฺหปฏิจฺฉนฺโน อโหสิ ฯ ยทา ปน ทิวาเยว ธนปาลกํ ปโยเชสิ ตทา ปากโฏ ชาโต ฯ กถํ ฯ เทวทตฺโต หตฺถึ ปโยเชสีติ หิ กถาย อุปฺปนฺนาย น เกวลํ หตฺถึ ปโยเชสิ ราชานํปิ มาราเปสิ อภิมาเรปิ เปเสสิ สิลํปิ ปวิชฺฌิ ปาโป เทวทตฺโตติ ปากโฏ อโหสิ ฯ เกน สทฺธึ อิทํ กมฺมมกาสีติ จ วุตฺเต รญฺญา อชาตสตฺตุนาติ อาหํสุ ฯ ตโต นาครา กถํ หิ นาม ราชา เอวรูปํ โจรํ สาสนกณฺฏกํ คเหตฺวา วิจริสฺสตีติ อุฏฺฐหึสุ ฯ ราชา นครสงฺโขภํ ญตฺวา เทวทตฺตํ นีหริ ฯ ตโต ปฏฺฐาย จสฺส ปญฺจถาลิปากสตานิ อุปจฺฉินฺทิ ฯ อุปฏฺฐานํปิสฺส น อคมาสิ ฯ อญฺเญปิสฺส มนุสฺสา น กิญฺจิ ทาตพฺพํ วา กาตพฺพํ วา มญฺญึสุ ฯ เตน วุตฺตํ ปริหีนลาภสกฺกาโรติ ฯ กุเลสุ วิญฺญาเปตฺวา วิญฺญาเปตฺวา ภุญฺชตีติ มา เม คโณ ภิชฺชีติ ปริสํ โปเสนฺโต ตฺวํ เอกสฺส ภิกฺขุโน ภตฺตํ เทหิ ตฺวํ ทฺวินฺนนฺติ เอวํ วิญฺญาเปตฺวา สปริโส กุเลสุ ภุญฺชติ ฯ {๒๑๑} จีวรํ ปริตฺตํ อุปฺปชฺชตีติ ภตฺตํ อคฺคณฺหนฺตานํ จีวรํ น เทนฺติ ตสฺมา ปริตฺตํ อุปฺปชฺชติ ฯ

{๒๑๒} จีวรการเก ภิกฺขู ภตฺเตน นิมนฺเตนฺตีติ คาเม ปิณฺฑาย จริตฺวา จิเรน จีวรํ นิฏฺฐาเปนฺเต ทิสฺวา เอวํ ลหุํ นิฏฺฐาเปตฺวา จีวรํ ปริภุญฺชิสฺสนฺตีติ ปุญฺญกมฺยตาย นิมนฺเตนฺติ ฯ {๒๑๕} นานาเวรชฺชเกติ นานาวิเธหิ อญฺญรชฺเชหิ อาคเต ฯ นานาเวรญฺชเก อิติปิ ปาโฐ ฯ อยเมวตฺโถ ฯ

{๒๑๗-๒๑๘} คณโภชเนติ คณสฺส โภชเน ฯ อิธ จ คโณ นาม จตฺตาโร ภิกฺขู อาทึ กตฺวา ตทุตฺตรึ ภิกฺขู อธิปฺเปตา ฯ เตเนว สพฺพนฺติมํ ปริจฺเฉทํ ทสฺเสนฺโต อาห ยตฺถ จตฺตาโร ภิกฺขู ฯเปฯ เอตํ คณโภชนํ นามาติ ฯ ตํ ปเนตํ คณโภชนํ ทฺวีหากาเรหิ ปสวติ นิมนฺตนโต วา วิญฺญตฺติโต วา ฯ กถํ นิมนฺตนโต ปสวติ ฯ จตฺตาโร ภิกฺขู อุปสงฺกมิตฺวา ตุมฺเห ภนฺเต โอทเนน นิมนฺเตมิ โอทนํ เม คณฺหาถ อากงฺขถ โอโลเกถ อธิวาเสถ ปฏิมาเนถาติ เอวํ เยนเกนจิ เววจเนน วา ภาสนฺตเรน วา ปญฺจนฺนํ โภชนานํ นามํ คเหตฺวา นิมนฺเตติ ฯ เอวํ เอกโต นิมนฺติตา ปริจฺฉินฺนกาลวเสน อชฺชตนาย วา สฺวาตนาย วา เอกโต คจฺฉนฺติ เอกโต คณฺหนฺติ เอกโต ภุญฺชนฺติ คณโภชนํ โหติ สพฺเพสํ อาปตฺติ ฯ เอกโต นิมนฺติตา เอกโต วา นานโต วา คจฺฉนฺติ เอกโต คณฺหนฺติ นานโต ภุญฺชนฺติ อาปตฺติเยว ฯ ปฏิคฺคหณเมว หิ เอตฺถ ปมาณํ ฯ เอกโต นิมนฺติตา เอกโต วา นานโต วา คจฺฉนฺติ นานโต คณฺหนฺติ เอกโต วา นานโต วา ภุญฺชนฺติ อนาปตฺติ ฯ จตฺตาริ ปริเวณานิ วา วิหาเร วา คนฺตฺวา นานโต นิมนฺติตา เอกฏฺฐาเน ฐิเตสุเยว วา เอโก ปุตฺเตน เอโก ปิตราติ เอวมฺปิ นานโต นิมนฺติตา เอกโต วา นานโต วา คจฺฉนฺตุ เอกโต วา นานโต วา ภุญฺชนฺตุ สเจ เอกโต คณฺหนฺติ คณโภชนํ โหติ สพฺเพสํ อาปตฺติ ฯ เอวํ ตาว นิมนฺตนโต ปสวติ ฯ กถํ วิญฺญตฺติโต ปสวติ ฯ จตฺตาโร ภิกฺขู เอกโต ฐิตา วา นิสินฺนา วา อุปาสกํ ทิสฺวา อมฺหากํ จตุนฺนํปิ ภตฺตํ เทหีติ วา วิญฺญาเปยฺยุํ ปาเฏกฺกํ วา ปสฺสิตฺวา มยฺหํ เทหิ มยฺหํ เทหีติ เอวํ เอกโต วา นานโต วา วิญฺญาเปตฺวา เอกโต วา คจฺฉนฺตุ นานโต วา ภตฺตํ คเหตฺวาปิ เอกโต วา ภุญฺชนฺตุ นานโต วา สเจ เอกโต คณฺหนฺติ คณโภชนํ โหติ สพฺเพสํ อาปตฺติ ฯ เอวํ วิญฺญตฺติโต ปสวติ ฯ