ปาทาปิ ผาลิตาติ ยถา มหาจมฺมสฺส ปรโต มํสํ ทิสฺสติ เอวํ ผาลิตา วาลิกาย วา สกฺขราย วา ปหตมตฺตา ทุกฺขํ อุปฺปาเทนฺติ น สกฺกา โหติ อนฺโตคาเม ปิณฺฑาย จริตุํ ฯ ตาทิเส เคลญฺเญ คิลานสมโยติ ภุญฺชิตพฺพํ ฯ น เลสกปฺปิยํ กาตพฺพํ ฯ จีวเร กริยมาเนติ ยทา สาฏกํ จ สุตฺตํ จ ลภิตฺวา จีวรํ กโรนฺติ ตทา ฯ วิสุํ หิ จีวรการสมโย นาม นตฺถิ ฯ ตสฺมา โย ตตฺถ จีวเร กตฺตพฺพํ ยงฺกิญฺจิ กมฺมํ กโรติ มหาปจฺจริยํ หิ อนฺตมโส สูจิเวธนโกติปิ วุตฺตํ เตน จีวรการสมโยติ ภุญฺชิตพฺพํ ฯ กุรุนฺทิยํ ปน วิตฺถาเรเนว วุตฺตํ โย จีวรํ วิจาเรติ ฉินฺทติ โมฆสุตฺตํ ฐเปติ อาคนฺตุกปฏํ ฐเปติ ปจฺจาคตํ สิพฺเพติ อาคนฺตุกปฏํ พนฺธติ อนุวาตํ ฉินฺทติ ฆฏฺเฏติ อาโรเปติ ตตฺถ ปจฺจาคตํ สิพฺพติ สุตฺตํ กโรติ วเลติ ปิปฺผลิกํ นิเสติ ปริวฏฺฏนํ กโรติ สพฺโพปิ จีวรํ กโรติเยวาติ วุจฺจติ โย ปน สมีเป นิสินฺโน ชาตกํ วา ธมฺมปทํ วา กเถติ อยํ น จีวรการโก เอตํ ฐเปตฺวา เสสานํ คณโภชเน อนาปตฺตีติ ฯ อฑฺฒโยชนนฺติ เอตฺตกํปิ อทฺธานํ คนฺตุกาเมน ฯ โย ปน ทูรํ คนฺตุกาโม ตตฺถ วตฺตพฺพเมว นตฺถิ ฯ คจฺฉนฺเตนาติ อทฺธานํ คจฺฉนฺเตน อฑฺฒโยชนพฺภนฺตเร คาวุเตปิ ภุญฺชิตุํ วฏฺฏติ ฯ คเตน ภุญฺชิตพฺพนฺติ คเตน เอกทิวสํ ภุญฺชิตพฺพํ ฯ นาวาภิรุหเณปิ เอเสว นโย ฯ อยํ ปน วิเสโส ฯ อภิรุฬฺเหน อิจฺฉิตฏฺฐานํ คนฺตฺวาปิ ยาว น โอโรหติ ตาว ภุญฺชิตพฺพนฺติ มหาปจฺจริยํ วุตฺตํ ฯ จตุตฺเถ อาคเตติ อยํ อนฺติมปริจฺเฉโท ฯ จตุตฺเถปิ อาคเต ยตฺถ น ยาเปนฺติ โส มหาสมโย ฯ ยตฺถ ปน สตํ วา สหสฺสํ วา สนฺนิปตนฺติ ตตฺถ วตฺตพฺพเมว นตฺถิ ฯ ตสฺมา ตาทิเส กาเล มหาสมโยติ อธิฏฺฐหิตฺวา ภุญฺชิตพฺพํ ฯ โย โกจิ ปริพฺพาชกสมาปนฺโนติ สหธมฺมิเกสุ วา ติตฺถิเยสุ วา อญฺญตโร ฯ เอเตสํ หิ เยนเกนจิ กเต ภตฺเต สมณภตฺตสมโยติ ภุญฺชิตพฺพํ ฯ

{๒๒๐} อนาปตฺติ สมเยติ สตฺตสุ สมเยสุ อญฺญตรสฺมึ อนาปตฺติ ฯ เทฺว ตโย เอกโตติ เยปิ อกปฺปิยนิมนฺตนํ สาทิยิตฺวา เทฺว วา ตโย วา เอกโต คเหตฺวา ภุญฺชนฺติ เตสํปิ อนาปตฺติ ฯ

ตตฺถ อนิมนฺติตจตุตฺถํ ปิณฺฑปาติกจตุตฺถํ อนุปสมฺปนฺนจตุตฺถํ ปตฺตจตุตฺถํ คิลานจตุตฺถนฺติ ปญฺจนฺนํ จตุกฺกานํ วเสน วินิจฺฉโย เวทิตพฺโพ ฯ กถํ ฯ อิเธกจฺโจ จตฺตาโร ภิกฺขู ภตฺตํ คณฺหาถาติ นิมนฺเตติ ฯ เตสุ ตโย คตา เอโก น คโต ฯ อุปาสโก เอโก ภนฺเต เถโร กุหินฺติ ปุจฺฉติ ฯ นาคโต อุปาสกาติ ฯ โส อญฺญํ ตํขณปฺปตฺตํ กญฺจิ เอหิ ภนฺเตติ สมฺปเวเสตฺวา จตุนฺนํ ภตฺตํ เทติ ฯ สพฺเพสํปิ อนาปตฺติ ฯ กสฺมา ฯ คณปูรกสฺส อนิมนฺติตตฺตา ฯ ตโยเอว น ตตฺถ นิมนฺติตา คณฺหึสุ เตหิ คโณ น ปูรติ คณปูรโก จ อนิมนฺติโต เตน คโณ ภิชฺชตีติ อิทํ อนิมนฺติตจตุตฺถํ ฯ ปิณฺฑปาติกจตุตฺเถ ฯ นมนฺตนกาเลปิ เอโก ปิณฺฑปาติโก โหติ โส นาธิวาเสติ ฯ คมนเวลาย ปน เอหิ ภนฺเตติ วุตฺเต อนธิวาสิตตฺตา อนาคจฺฉนฺตํปิ เอถ ภิกฺขํ ลจฺฉถาติ คเหตฺวา คจฺฉนฺติ ฯ โส ตํ คณํ ภินฺทติ ฯ ตสฺมา สพฺเพสํ อนาปตฺติ ฯ อนุปสมฺปนฺนจตุตฺเถ ฯ สามเณเรน สทฺธึ นิมนฺติตา โหนฺติ ฯ โสปิ คณํ ภินฺทติ ฯ ปตฺตจตุตฺเถ ฯ เอโก สยํ อคนฺตฺวา ปตฺตํ เปเสสิ ฯ เอวํปิ คโณ ภิชฺชติ ฯ ตสฺมา สพฺเพสํ อนาปตฺติ ฯ คิลานจตุตฺเถ ฯ คิลาเนน สทฺธึ นิมนฺติตา โหนฺติ ฯ ตตฺถ คิลานสฺเสว อนาปตฺติ อิตเรสํ ปน คณปูรโก โหติ ฯ น หิ คิลาเนน คโณ ภิชฺชติ ฯ ตสฺมา เตสํ อาปตฺติเยว ฯ มหาปจฺจริยํ ปน อวิเสเสน วุตฺตํ