สมยลทฺธโก สยเมว มุจฺจติ เสสานํ คณปูรกตฺตา อาปตฺติกโร โหตีติ ฯ ตสฺมา จีวรทานสมยลทฺธกาทีนํปิ วเสน จตุกฺกานิ เวทิตพฺพานิ ฯ สเจ ปน อธิวาเสตฺวา คเตสุปิ จตูสุ ชเนสุ เอโก ปณฺฑิโต ภิกฺขุ อหํ ตุมฺหากํ คณํ ภินฺทิสฺสามิ นิมนฺตนํ สาทิยถาติ วตฺวา ยาคุขชฺชกาวสาเน ภตฺตตฺถาย ปตฺตํ คณฺหนฺตานํ อทตฺวา อิเม ตาว ภิกฺขู โภเชตฺวา วิสฺสชฺเชถ อหํ ปจฺฉา อนุโมทนํ กตฺวา คมิสฺสามีติ นิสินฺโน เตสุ ภุตฺวา คเตสุ เทถ ภนฺเต ปตฺตนฺติ อุปาสเกน ปตฺตํ คเหตฺวา ภตฺเต ทินฺเน ภุตฺวา อนุโมทนํ กตฺวา คจฺฉติ สพฺเพสํ อนาปตฺติ ฯ ปญฺจนฺนํ หิ โภชนานํเยว วเสน คณโภชเน วิสํเกตํ นตฺถิ ฯ โอทเนน นิมนฺติตา กุมฺมาสํ คณฺหนฺตาปิ อาปตฺตึ อาปชฺชนฺติ ฯ ตานิ จ เตหิ เอกโต น คหิตานิ ฯ ยาคุอาทีหิ ปน วิสํเกตํ โหติ ฯ ตานิ เตหิ เอกโต คหิตานีติ ฯ เอวํ เอโก ปณฺฑิโต อญฺเญสํปิ อนาปตฺตึ กโรติ ฯ ตสฺมา สเจ โกจิ สงฺฆภตฺตํ กตฺตุกาเมน นิมนฺตนตฺถาย เปสิโต วิหารํ อาคมฺม ภนฺเต เสฺว อมฺหากํ ฆเร ภิกฺขํ คณฺหาถาติ อวตฺวา ภตฺตํ คณฺหาถาติ วา สงฺฆภตฺตํ คณฺหาถาติ วา สงฺโฆ ภตฺตํ คณฺหาตูติ วา วทติ ภตฺตุทฺเทสเกน ปณฺฑิเตน ภวิตพฺพํ ฯ นิมนฺตนิกา คณโภชนโต ปิณฺฑปาติกา ธุตงฺคเภทโต โมเจตพฺพา ฯ กถํ ฯ เอวํ ตาว วตฺตพฺพํ เสฺว น สกฺกา อุปาสกาติ ฯ ปุนทิวเส ภนฺเตติ ฯ ปุนทิวเส น สกฺกาติ ฯ เอวํ ยาวอฑฺฒมาสํปิ หริตฺวา ปุน วตฺตพฺโพ ตฺวํ กึ อวจาติ ฯ สเจ ปุนปิ สงฺฆภตฺตํ คณฺหาถาติ วทติ ตโต อิมํ ตาว อุปาสก ปุปฺผํ กปฺปิยํ กโรหิ อิมํ ติณนฺติ เอวํ วิกฺเขปํ กตฺวา ปุน กึ กถยิตฺถาติ ปุจฺฉิตพฺโพ ฯ สเจ ปุนปิ ตเถว วทติ อาวุโส ตฺวํ ปิณฺฑปาติเก วา มหาเถเร วา น ลจฺฉสิ สามเณเร ลจฺฉสีติ วตฺตพฺโพ ฯ นนุ ภนฺเต อสุกสฺมึ จ อสุกสฺมึ จ คาเม ภทนฺเต โภเชสุํ อหํ กสฺมา น ลภามีติ จ วุตฺเต เต นิมนฺเตตุํ ชานนฺติ ตฺวํ น ชานาสีติ ฯ เต กถํ นิมนฺเตสุํ ภนฺเตติ ฯ เต เอวมาหํสุ อมฺหากํ ภนฺเต ภิกฺขํ คณฺหาถาติ ฯ สเจ โสปิ ตเถว วทติ วฏฺฏติ ฯ อถ ปุนปิ ภตฺตํ คณฺหาถาติ วทติ น ทานิ ตฺวํ อาวุโส พหู ภิกฺขู ลจฺฉสิ ตโยเอว ลจฺฉสีติ วตฺตพฺโพ ฯ นนุ ภนฺเต อสุกสฺมึ จ อสุกสฺมึ จ คาเม สกลํ ภิกฺขุสงฺฆํ โภเชสุํ อหํ กสฺมา น ลภามีติ ฯ ตฺวํ นิมนฺเตตุํ น ชานาสีติ ฯ เต กถํ นิมนฺเตสุํ ภนฺเตติ ฯ เต เอวมาหํสุ อมฺหากํ ภนฺเต ภิกฺขํ คณฺหาถาติ ฯ สเจ โสปิ ตเถว วทติ วฏฺฏติ ฯ อถ ปุนปิ ภตฺตเมวาติ วทติ ฯ ตโต วตฺตพฺโพ คจฺฉ ตฺวํ นตฺถิ อมฺหากํ ตว ภตฺเตนตฺโถ นิพทฺธโคจโร เอส อมฺหากํ มยเมตฺถ ปิณฺฑาย จริสฺสามาติ ฯ ตํ จรถ ภนฺเตติ วตฺวา อาคตํ ปุจฺฉนฺติ กึ โภ ลทฺธา ภิกฺขูติ ฯ กึ เอเตน พหุ เอตฺถ วตฺตพฺพํ เถรา เสฺว ปิณฺฑาย จริสฺสามาติ อาหํสุ มา ทานิ ตุมฺเห ปมชฺชิตฺถาติ ฯ ทุติยทิวเส เจติยวตฺตํ กตฺวา ฐิตา ภิกฺขู สงฺฆตฺเถเรน วตฺตพฺพา อาวุโส ธุรคาเม สงฺฆภตฺตํ อปณฺฑิตมนุสฺโส ปน อคมาสิ คจฺฉาม ธุรคาเม ปิณฺฑาย จริสฺสามาติ ฯ ภิกฺขู เถรสฺส วจนํ กาตพฺพํ น ทุพฺพเจหิ ภวิตพฺพํ คามทฺวาเร อฏฺฐตฺวาว ปิณฺฑาย จริตพฺพํ ฯ เตสุ ปตฺตานิ คเหตฺวา นิสีทาเปตฺวา โภเชนฺเตสุ ภุญฺชิตพฺพํ ฯ สเจ อาสนสาลาย ภตฺตํ ฐเปตฺวา รถิกาสุ อาหิณฺฑนฺตา อาโรเจนฺติ อาสนสาลาย ภนฺเต ภตฺตํ คณฺหาถาติ น วฏฺฏติ ฯ อถ ปน ภตฺตํ อาทาย ตตฺถ ตตฺถ คนฺตฺวา ภตฺตํ คณฺหาถาติ วทนฺติ ปฏิกจฺเจว วา วิหารํ อภิหริตฺวา ปฏิรูเป ฐาเน ฐเปตฺวา อาคตาคตานํ เทนฺติ อยํ อภิหฏภิกฺขา นาม วฏฺฏติ ฯ สเจ ปน ภตฺตสาลาย ทานํ สชฺเชตฺวา ตํตํ ปริเวณํ ปหิณนฺติ ภตฺตสาลาย ภตฺตํ คณฺหาถาติ น วฏฺฏติ ฯ เย ปน มนุสฺสา ปิณฺฑาย ปวิฏฺเฐ ภิกฺขู ทิสฺวาว อาสนสาลํ สมฺมชฺชิตฺวา ตตฺถ นิสีทาเปตฺวา โภเชนฺติ น เต ปฏิกฺขิปิตพฺพา ฯ เย ปน คาเม ภิกฺขํ อลภิตฺวา คามโต นิกฺขมนฺเต ภิกฺขู ทิสฺวา ภนฺเต ภตฺตํ คณฺหาถาติ วทนฺติ เต ปฏิกฺขิปิตพฺพา ฯ น วา นิวตฺติตพฺพํ ฯ สเจ นิวตฺตถ ภนฺเต ภตฺตํ คณฺหาถาติ วทนฺติ นิวตฺตถาติ วุตฺตปเท นิวตฺติตุํ วฏฺฏติ ฯ นิวตฺตถ ภนฺเต ฆเร ภตฺตํ กตํ คาเม ภตฺตํ กตนฺติ ฯ เคเห จ คาเม จ ภตฺตํ นาม ยสฺส กสฺสจิ โหตีติ นิวตฺติตุํ วฏฺฏติ ฯ นิวตฺตถ ภตฺตํ คณฺหาถาติ สํพนฺธํ กตฺวา วทนฺติ นิวตฺติตุํ น วฏฺฏติ ฯ อาสนสาลโต ปิณฺฑาย จริตุํ นิกฺขมนฺเต ทิสฺวา นิสีทถ ภนฺเต ภตฺตํ คณฺหาถาติ วุตฺเตปิ เอเสว นโย ฯ