เอวํ อสนนฺติ อาทีสุ ยญฺจ อสติ ยญฺจ โภชนํ หตฺถปาเส ฐิเตน อภิหฏํ ปฏิกฺขิปนฺโต ปวารณํ อาปชฺชติ ตํ ญตฺวา อิทานิ ยถา อาปชฺชติ ตสฺส ชานนตฺถํ อยํ วินิจฺฉโย ฯ อสนํ โภชนนฺติ เอตฺถ ตาว เยน เอกํ สิฏฺฐํปิ อชฺโฌหฏํ โหติ โส สเจ ปตฺตมุขหตฺถานํ ยตฺถ กตฺถจิ ปญฺจสุ โภชเนสุ เอกสฺมึปิ สติ อญฺญํ ปญฺจสุ โภชเนสุ เอกํปิ ปฏิกฺขิปติ ปวาเรติ ฯ กตฺถจิ โภชนํ นตฺถิ อามิสคนฺธมตฺตํ ปญฺญายติ น ปวาเรติ ฯ มุเข จ หตฺเถ จ โภชนํ นตฺถิ ปตฺเต อตฺถิ ตสฺมึ ปน อาสเน น ภุญฺชิตุกาโม วิหารํ วา ปวิสิตฺวา ภุญฺชิตุกาโม อญฺญสฺส วา ทาตุกาโม ตสฺมึ เจ อนฺตเร อญฺญตรํ โภชนํ ปฏิกฺขิปติ น ปวาเรติ ฯ กสฺมา ฯ วิปฺปกตโภชนภาวสฺส อุปจฺฉินฺนตฺตา ฯ โยปิ อญฺญตฺถ คนฺตฺวา ภุญฺชิตุกาโม มุเข ภตฺตํ คิลิตฺวา เสสํ อาทาย คจฺฉนฺโต อนฺตรามคฺเค อญฺญํ โภชนํ ปฏิกฺขิปติ ตสฺสาปิ ปวารณา น โหตีติ มหาปจฺจริยํ วุตฺตํ ฯ ยถา จ ปตฺเต เอวํ หตฺเถปิ มุเขปิ วา วิชฺชมานํ โภชนํ สเจ อนชฺโฌหริตุกาโม โหติ ตสฺมึ จ ขเณ อญฺญํ ปฏิกฺขิปติ น ปวาเรติ ฯ เอกสฺมึ หิ ปเท วุตฺตลกฺขณํ สพฺพตฺถ เวทิตพฺพํ โหติ ฯ อปิจ กุรุนฺทิยํ เอส นโย ทสฺสิโตเยว ฯ วุตฺตํ หิ ตตฺถ มุเข ภตฺตํ คิลิตํ หตฺเถ ภตฺตํ วิฆาสาทสฺส ทาตุกาโม ปตฺเต ภตฺตํ ภิกฺขุสฺส ทาตุกาโม สเจ ตสฺมึ ขเณ ปฏิกฺขิปติ น ปวาเรตีติ ฯ หตฺถปาเส ฐิโตติ เอตฺถ ปน สเจ ภิกฺขุ นิสินฺโน โหติ อาสนสฺส ปจฺฉิมนฺตโต ปฏฺฐาย สเจ ฐิโต ปญฺหิอนฺตโต ปฏฺฐาย สเจ นิปนฺโน เยน ปสฺเสน นิปนฺโน ตสฺส ปาริมนฺตโต ปฏฺฐาย ทายกสฺส นิสินฺนสฺส วา ฐิตสฺส วา นิปนฺนสฺส วา ฐเปตฺวา ปสาริตหตฺถํ ยํ อาสนฺนตรํ องฺคํ ตสฺส โอริมนฺเตน ปริจฺฉินฺทิตฺวา อฑฺฒเตยฺยหตฺโถ หตฺถปาโสติ เวทิตพฺโพ ฯ ตสฺมึ ฐตฺวา อภิหฏํ ปฏิกฺขิปนฺตสฺเสว ปวารณา โหติ น ตโต ปรํ ฯ อภิหรตีติ หตฺถปาสพฺภนฺตเร ฐิโต คหณตฺถํ อุปนาเมติ ฯ สเจ ปน อนนฺตรานิสินฺโน ภิกฺขุ หตฺเถ วา อุรูสุ วา อาธารเก วา ฐิตํ ปตฺตํ อนภิหริตฺวา ว ภตฺตํ คณฺหาหีติ วทติ ตํ ปฏิกฺขิปโต ปวารณา นตฺถิ ฯ ภตฺตปจฺฉึ อาเนตฺวา ปุรโต ภูมิยํ ฐเปตฺวา คณฺหาติ วุตฺเตปิ เอเสว นโย ฯ อีสกํ ปน อุทฺธริตฺวา วา อุปนาเมตฺวา วา คณฺหาถาติ วุตฺเต ปน ปฏิกฺขิปโต ปวารณา โหติ ฯ เถราสเน นิสินฺโน เถโร ทูเร นิสินฺนสฺส ทหรภิกฺขุสฺส ปตฺตํ เปเสตฺวา อิโต โอทนํ คณฺหาหีติ วทติ คณฺหิตฺวา ปน คโต ตุณฺหี ติฏฺฐติ ฯ ทหโร อลํ มยฺหนฺติ ปฏิกฺขิปติ น ปวาเรติ ฯ กสฺมา ฯ เถรสฺส ทูรภาวโต ทูตสฺส จ อนภิหรณโตติ ฯ สเจ ปน คเหตฺวา อาคโต ภิกฺขุ อิมํ ภตฺตํ คณฺหาติ วทติ ตํ ปฏิกฺขิปโต ปวารณา โหติ ฯ