{๓๘๒} สปฺปาณกวคฺคสฺส ปฐมสิกฺขาปเท ฯ อิสฺสาโส โหตีติ คิหิกาเล ธนุคฺคหาจริโย โหติ ฯ ชีวิตา โวโรปิตาติ ชีวตา วิโยชิตา ฯ

สิกฺขาปเทปิ โวโรเปยฺยาติ วิโยเชยฺย ฯ ยสฺมา ปน โวหารมตฺตเมเวตํ น เหตฺถ กิญฺจิ วิโยชิเต สีสาลงฺกาเร สีสํ วิย ชีวตา โวโรปิเต ปาเณ ชีวิตํ นาม วิสุํ ติฏฺฐติ อญฺญทตฺถุ อนฺตรธานเมว คจฺฉติ ตสฺมา ตมตฺถํ ทสฺเสตุํ ปทภาชเน ชีวิตินฺทฺริยํ อุปจฺฉินฺทตีติอาทิ วุตฺตํ ฯ อิมสฺมึ จ สิกฺขาปเท ติรจฺฉานคโตเยว ปาโณติ เวทิตพฺโพ ฯ ตํ ขุทฺทกํปิ มหนฺตํปิ มาเรนฺตสฺส อาปตฺติ ฯ นานากรณํ นตฺถิ ฯ มหนฺเต ปน อุปกฺกมมหนฺตตฺตา อกุสลมหตฺตํ โหติ ฯ ปาเณ ปาณสญฺญีติ อนฺตมโส มญฺจปีฐํ โสเธนฺโต มงฺกุณพีชเกปิ ปาณกสญฺญี นิกฺการุณิกตาย ตํ ภินฺทนฺโต อปเนติ ปาจิตฺติยํ ฯ ตสฺมา เอวรูเปสุ ฐาเนสุ การุญฺญํ อุปฏฺฐเปตฺวา อปฺปมตฺเตน วตฺตํ กาตพฺพํ ฯ เสสํ มนุสฺสวิคฺคเห วุตฺตนเยเนว เวทิตพฺพํ สทฺธึ สมุฏฺฐานาทีหิ ฯ

สญฺจิจฺจปาณสิกฺขาปทํ ปฐมํ ฯ