{๓๘๗} ทุติยสิกฺขาปเท ฯ สปฺปาณกนฺติ เย ปาณกา ปริโภเคน มรนฺติ เตหิ ปาณเกหิ สปฺปาณกํ ฯ ตาทิสํ หิ ชานํ ปริภุญฺชโต ปโยเค ปโยเค ปาจิตฺติยํ ฯ ปตฺตปูรํปิ อวิจฺฉินฺทิตฺวา เอกปฺปโยเคน ปิวโต เอกา อาปตฺติ ฯ ตาทิเสน อุทเกน สามิสํ ปตฺตํ อาวิชฺฌิตฺวา โธวโตปิ ตาทิเส อุทเก อุณฺหยาคุปตฺตํ นิพฺพาปยโตปิ ตํ อุทกํ หตฺเถน วา อุฬุงฺเกน วา คเหตฺวา นหายโตปิ ปโยเค ปโยเค ปาจิตฺติยํ ฯ อุทกโสณฺฑึ วา โปกฺขรณึ วา ปวิสิตฺวา พหิ นิกฺขมนตฺถาย วีจึ อุฏฺฐาปยโตปิ ฯ โสณฺฑึ วา โปกฺขรณึ วา โสเธนฺเตหิ ตโต คหิตอุทกํ อุทเกเยว อาสิญฺจิตพฺพํ ฯ สมีปมฺหิ อุทเก อสติ กปฺปิยอุทกสฺส อฏฺฐ วา ทส วา ฆเฏ อุทกสณฺฐานกปฺปเทเส อาสิญฺจิตฺวา ตตฺถ อาสิญฺจิตพฺพํ ฯ ปวฏฺฏิตฺวา อุทเก ปติสฺสตีติ อุณฺหปาสาเณ อุทกํ นาสิญฺจิตพฺพํ ฯ กปฺปิยอุทเกน ปน ปาสาณํ นิพฺพาเปตฺวา อาสิญฺจิตุํ วฏฺฏติ ฯ

เสสเมตฺถ อุตฺตานเมว ฯ ติสมุฏฺฐานํ กิริยา สญฺญาวิโมกฺขํ สจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ เอตฺถ จ ปฏงฺคปาณกานํ ปตนํ ญตฺวาปิ สุทฺธจิตฺตตาย ทีปุชฺชลเน วิย สปฺปาณกภาวํ ญตฺวาปิ อุทกสญฺญาย ปริภุญฺชิตพฺพโต ปณฺณตฺติวชฺชตา เวทิตพฺพาติ ฯ

สปฺปาณกสิกฺขาปทํ ทุติยํ ฯ