กถํ อญฺญาณตาย อาปชฺชติ ฯ อญฺญาณิปุคฺคโล หิ มนฺโท โมมุโห กตฺตพฺพากตฺตพฺพํ อชานนฺโต อกตฺตพฺพํ กโรติ กตฺตพฺพํ วิราเธติ เอวํ อญฺญาณตาย อาปชฺชติ ฯ กถํ กุกฺกุจฺจปฺปกตตาย

กปฺปิยากปฺปิยํ นิสฺสาย กุกฺกุจฺเจ อุปฺปนฺเน วินยธรํ ปุจฺฉิตฺวา กปฺปิยํ เจ กตฺตพฺพํ สิยา อกปฺปิยํ เจ น กตฺตพฺพํ สิยา อยํ ปน วฏฺฏตีติ มทฺทิตฺวา วีติกฺกมติเยว เอวํ กุกฺกุจฺจปฺปกตตาย อาปชฺชติ ฯ กถํ อกปฺปิเย กปฺปิยสญฺญิตาย อาปชฺชติ ฯ อจฺฉมํสํ สูกรมํสนฺติ ขาทติ ทีปิมํสํ มิคมํสนฺติ ขาทติ อกปฺปิยโภชนํ กปฺปิยโภชนนฺติ ภุญฺชติ วิกาเล กาลสญฺญาย ภุญฺชติ อกปฺปิยปานกํ กปฺปิยปานกนฺติ ปิวติ เอวํ อกปฺปิเย กปฺปิยสญฺญิตาย อาปชฺชติ ฯ กถํ กปฺปิเย อกปฺปิยสญฺญิตาย อาปชฺชติ ฯ สูกรมํสํ อจฺฉมํสนฺติ ขาทติ มิคมํสํ ทีปิมํสนฺติ ขาทติ กปฺปิยโภชนํ อกปฺปิยโภชนนฺติ ภุญฺชติ กาเล วิกาลสญฺญาย ภุญฺชติ กปฺปิยปานกํ อกปฺปิยปานกนฺติ ปิวติ เอวํ กปฺปิเยอกปฺปิยสญฺญิตาย อาปชฺชติ ฯ กถํ สติสมฺโมสาย อาปชฺชติ ฯ สหเสยฺยาติจีวรวิปฺปวาสเภสชฺชจีวรกาลาติกฺกมนปจฺจยา อาปตฺตึ จ สติสมฺโมสาย อาปชฺชติ ฯ เอวมิเธกจฺโจ ภิกฺขุ อิเมหิ ฉหิ อากาเรหิ อาปตฺตึ อาปชฺชติ ฯ วินยธโร ปน อิเมหิ ฉหิ อากาเรหิ อาปตฺตึ น อาปชฺชติ ฯ กถํ อลชฺชิตาย นาปชฺชติ ฯ โส หิ ปสฺสถ โภ อยํ กปฺปิยากปฺปิยํ ชานนฺโตเยว ปณฺณตฺติวีติกฺกมํ กโรตีติ อิมํ ปรูปวาทํ รกฺขนฺโตปิ นาปชฺชติ เอวํ อลชฺชิตาย นาปชฺชติ ฯ สหสา อาปนฺนํปิ เทสนาคามินึ เทเสตฺวา วุฏฺฐานคามินิยา วุฏฺฐหิตฺวา สุทฺธนฺเต ปติฏฺฐาติ ฯ ตโต ปฏฺฐาย

สญฺจิจฺจ อาปตฺตึ นาปชฺชติ

อาปตฺตึ น ปริคูหติ