ปาฏิเทสนียกณฺฑวณฺณนา

ปาฏิเทสนียา ธมฺมา ขุทฺทกานํ อนนฺตรา

ฐปิตา เย อยํ ทานิ เตสํ ภวติ วณฺณนา ฯ

{๕๕๒} ปฐมปาฏิเทสนีเย ตาว ฯ ปฏิกฺกมนกาเลติ ปิณฺฑาย จริตฺวา ปฏิอาคมนกาเล ฯ สพฺเพว อคฺคเหสีติ สพฺพเมว อคฺคเหสิ ฯ ปเวเธนฺตีติ กมฺปมานา ฯ อเปหีติ อปคจฺฉ น โอกาสํ เทถาติ อตฺโถ ฯ {๕๕๓-๕๕๕} คารยฺหํ อาวุโสติอาทิ ปฏิเทเสตพฺพาการทสฺสนํ ฯ รถิกาติ รจฺฉา ฯ พฺยูหนฺติ อนิวิชฺฌิตฺวา ฐิตา คตปจฺจาคตรจฺฉา ฯ สึฆาฏกนฺติ จตุกฺโกณํ วา ติโกณํ วา มคฺคสโมธานฏฺฐานํ ฯ ฆรนฺติ กุลฆรํ ฯ เอเตสุ รถิกาทีสุ ยตฺถกตฺถจิ ฐตฺวา คณฺหนฺตสฺส คหเณ ทุกฺกฏํ ฯ อชฺโฌหารคณนาย ปาฏิเทสนียํ ฯ หตฺถิสาลาทีสุ คณฺหนฺตสฺสาปิ เอเสว นโย ฯ ภิกฺขุนี รถิกาย ฐตฺวา เทติ ภิกฺขุ อนฺตรารามาทีสุ ฐตฺวา คณฺหาติ อาปตฺติเยว ฯ อนฺตรฆรํ ปวิฏฺฐายาติ หิ วจนโต ภิกฺขุนิยา อนฺตรฆเร ฐตฺวา ททมานาย วเสเนตฺถ อาปตฺติ เวทิตพฺพา ฯ ภิกฺขุสฺส ฐิตฏฺฐานํ ปน อปฺปมาณํ ฯ ตสฺมา สเจปิ วีถิอาทีสุ ฐิโต ภิกฺขุ อนฺตรารามาทีสุ ฐตฺวา ททมานาย ภิกฺขุนิยา คณฺหาติ อนาปตฺติเยว ฯ ยามกาลิกํ สตฺตาหกาลิกํ ยาวชีวิกํ อาหารตฺถาย ปฏิคฺคณฺหาติ อาปตฺติ ทุกฺกฏสฺส อชฺโฌหาเร อชฺโฌหาเร อาปตฺติ ทุกฺกฏสฺสาติ อิทํ อามิเสน อสํภินฺนํ สนฺธาย วุตฺตํ ฯ สํภินฺเน ปน เอกรเส ปาฏิเทสนียเมว ฯ เอกโต อุปสมฺปนฺนายาติ ภิกฺขุนีนํ สนฺติเก อุปสมฺปนฺนาย ฯ ภิกฺขูนํ สนฺติเก อุปสมฺปนฺนาย ปน ยถาวตฺถุกเมว ฯ