สตฺตโม วคฺโค ฯ

สมุฏฺฐานาทิทีปนตฺถาย ปเนตฺถ อิทํ ปกิณฺณกํ อุชฺชคฺฆิกอุจฺจาสทฺทปฏิสํยุตฺตานิ จตฺตาริ สกวเฬน มุเขน พฺยาหรณํ เอกํ ฉมา นีจาสนฏฺฐานปจฺฉโตคมนอุปฺปถคมนปฏิสํยุตฺตานิ ปญฺจาติ อิมานิ ทสสิกฺขาปทานิ สมนุภาสนสมุฏฺฐานานิ กายวาจาจิตฺตโต สมุฏฺฐหนฺติ กิริยา สญฺญาวิโมกฺขานิ สจิตฺตกานิ โลกวชฺชานิ กายกมฺมานิ วจีกมฺมานิ อกุสลจิตฺตานิ ทุกฺขเวทนานีติ ฯ สูโปทนวิญฺญตฺติสิกฺขาปทํ เถยฺยสตฺถสมุฏฺฐานํ กายจิตฺตโต กายวาจาจิตฺตโต จ สมุฏฺฐาติ กิริยา สญฺญาวิโมกฺขํ สจิตฺตกํ โลกวชฺชํ กายกมฺมํ วจีกมฺมํ อกุสลจิตฺตํ ทุกฺขเวทนนฺติ ฯ ฉตฺตปาณิทณฺฑปาณิสตฺถปาณิ- อาวุธปาณิปาทุกอุปาหนยานสยนปลฺลตฺถิกเวฐิตโอคุณฺฐิตนามกานิ เอกาทส สิกฺขาปทานิ ธมฺมเทสนสมุฏฺฐานานิ วาจาจิตฺตโต สมุฏฺฐหนฺติ กิริยากิริยานิ สญฺญาวิโมกฺขานิ สจิตฺตกานิ โลกวชฺชานิ วจีกมฺมานิ อกุสลจิตฺตานิ ทุกฺขเวทนานีติ ฯ อวเสสานิ เตปณฺณาส สิกฺขาปทานิ ปฐมปาราชิกสมุฏฺฐานานีติ ฯ สพฺพเสขิเยสุ อาพาธปจฺจยา อนาปตฺติ ฯ ถูปีกตปิณฺฑปาเต สูปพฺยญฺชนปฏิจฺฉาทเน อุชฺฌานสญฺญมฺหีติ ตีสุ สิกฺขาปเทสุ คิลาโน นตฺถีติ ฯ

เสขิยวณฺณนา นิฏฺฐิตา ฯ