สลฺเลขํ อจฺจชนฺเตน อปฺปมตฺเตน ภิกฺขุนา

กปฺปิเยปิ น กาตพฺพา อามิสตฺถาย โลลตาติ ฯ โย จายํ ตฬาเก วุตฺโต โปกฺขรณีอุทกวาหกมาติกาทีสุปิ เอเสว นโย ฯ ปุพฺพณฺณาปรณฺณอุจฺฉุนาฬิเกราทีนํ วิรุหณฏฺฐานํ ยงฺกิญฺจิ เขตฺตํ วา วตฺถุํ วา ทมฺมีติ วุตฺเตปิ น วฏฺฏตีติ ปฏิกฺขิปิตฺวา ตฬาเก วุตฺตนเยเนว ปฏิปชฺชิตพฺพํ ฯ ยทา กปฺปิยโวหาเรน จตุปจฺจยปริโภคตฺถาย ทมฺมีติ วทติ ตทา สมฺปฏิจฺฉิตพฺพํ ฯ วนํ ทมฺมิ อรญฺญํ ทมฺมีติ วุตฺเต ปน วฏฺฏติ ฯ สเจ มนุสฺสา ภิกฺขูหิ อนาณตฺตาเยว ตตฺถ รุกฺเข ฉินฺทิตฺวา อปรณฺณาทีนิ สมฺปาเทตฺวา ภิกฺขูนํ ภาคํ เทนฺติ วฏฺฏติ ฯ อเทนฺตา น โจเทตพฺพา น สาเรตพฺพา ฯ สเจ เกนจิเทว อนฺตราเยน เตสุ ปกฺกนฺเตสุ อญฺเญ กโรนฺติ น จ ภิกฺขูนํ กิญฺจิ เทนฺติ เต วาเรตพฺพา ฯ สเจ วทนฺติ นนุ ภนฺเต ปุพฺเพปิ มนุสฺสา อิธ สสฺสานิ อกํสูติ ตโต วตฺตพฺพา เต สงฺฆสฺส อิทญฺจีทญฺจ กปฺปิยภณฺฑํ อทํสูติ ฯ สเจ วทนฺติ มยํปิ ทสฺสามาติ เอวํ วฏฺฏติ ฯ กญฺจิ สสฺสุฏฺฐานกํ ภูมิปฺปเทสํ สนฺธาย สีมํ เทมาติ วทนฺติ วฏฺฏติ ฯ สีมาปริจฺเฉทนตฺถํ ปน ถมฺภา วา ปาสาณา วา สยํ น ฐเปตพฺพา ฯ กสฺมา ฯ ภูมิ นาม อนคฺฆา อปฺปเกนาปิ ปาราชิโก ภเวยฺย ฯ อารามิกานํ ปน วตฺตพฺพํ อิมินา ฐาเนน อมฺหากํ สีมา คตาติ ฯ สเจปิ หิ เต อธิกํ คณฺหนฺติ ปริยาเยน กถิตตฺตา อนาปตฺติ ฯ ยทิ ปน ราชราชมหามตฺตาทโย สยเมว ถมฺเภ ฐปาเปตฺวา จตฺตาโร ปจฺจเย ปริภุญฺชถาติ เทนฺติ วฏฺฏติเยว ฯ สเจ โกจิ อนฺโตสีมายํ ตฬากํ ขนติ วิหารมชฺเฌน วา มาติกํ เนติ เจติยงฺคณโพธิยงฺคณาทีนิ ทุสฺสนฺติ วาเรตพฺโพ ฯ สเจ สงฺโฆ กิญฺจิ ลภิตฺวา อามิสครุกตาย น วาเรติ เอโก ภิกฺขุ วาเรติ โสว ภิกฺขุ อิสฺสโร ฯ สเจ เอโก ภิกฺขุ น วาเรติ เนถ ตุมฺเหติ เตสํเยว ปกฺโข โหติ สงฺโฆ วาเรติ สงฺโฆว อิสฺสโร ฯ สงฺฆิเกสุ หิ กมฺเมสุ โย ธมฺมกมฺมํ กโรติ โส อิสฺสโร ฯ สเจ วาริยมาโนปิ กโรติ เหฏฺฐา คหิตํ ปํสุํ เหฏฺฐา ปกฺขิปิตฺวา อุปริ คหิตํ ปํสุํ อุปริ ปกฺขิปิตฺวา ปูเรตพฺพา ฯ สเจ โกจิ ยถาชาตเมว อุจฺฉุํ วา อปรณฺณํ วา อลาวุกุมฺภณฺฑาทิกํ วา วลฺลีผลํ ทาตุกาโม เอตํ สพฺพํ อุจฺฉุกฺเขตฺตํ อปรณฺณวตฺถุํ วลฺลีผลาวาฏํ ทมฺมีติ วทติ สห วตฺถุนา ปรามฏฺฐตฺตา น วฏฺฏตีติ มหาสุมตฺเถโร อาห ฯ มหาปทุมตฺเถโร ปน อภิลาปมตฺตเมตํ สามิกานํเยว หิ โส ภูมิภาโค ตสฺมา วฏฺฏตีติ อาห ฯ ทาสํ ทมฺมีติ วทติ น วฏฺฏติ ฯ อารามิกํ ทมฺมิ เวยฺยาวจฺจกรํ ทมฺมิ กปฺปิยการกํ ทมฺมีติ วุตฺเต วฏฺฏติ ฯ สเจ โส อารามิโก ปุเรภตฺตํปิ ปจฺฉาภตฺตํปิ สงฺฆสฺเสว กมฺมํ กโรติ สามเณรสฺส วิย สพฺพํ เภสชฺชปฏิชคฺคนํปิ ตสฺส กาตพฺพํ ฯ สเจ ปุเรภตฺตเมว สงฺฆสฺส กมฺมํ กโรติ ปจฺฉาภตฺตํ อตฺตโน กมฺมํ กโรติ สายํ นิวาโป น ทาตพฺโพ ฯ เยปิ ปญฺจทิวสวาเรน วา ปกฺขวาเรน วา สงฺฆสฺส กมฺมํ กตฺวา เสสกาเล อตฺตโน กมฺมํ กโรนฺติ เตสํปิ กรณกาเลเยว ภตฺตญฺจ นิวาโป จ ทาตพฺโพ ฯ สเจ สงฺฆสฺส กมฺมํ นตฺถิ อตฺตโนเยว กมฺมํ กตฺวา ชีวนฺติ เต เจ หตฺถกมฺมมูลํ อาเนตฺวา เทนฺติ คเหตพฺพํ ฯ โน เจ เทนฺติ น กิญฺจิ วตฺตพฺพา ฯ ยงฺกิญฺจิ รชกทาสํปิ เปสการทาสํปิ อารามิกนาเมน สมฺปฏิจฺฉิตุํ วฏฺฏติ ฯ สเจ คาโว เทมาติ วทนฺติ น วฏฺฏตีติ ปฏิกฺขิปิตพฺพา ฯ อิมา คาโว กุโตติ ฯ ปณฺฑิเตหิ ปญฺจโครสปริโภคตฺถาย ทินฺนาติ วตฺตพฺพา ฯ มยํปิ ปญฺจโครสปริโภคตฺถาย เทมาติ วุตฺเต วฏฺฏติ ฯ อชิกาทีสุปิ เอเสว นโย ฯ หตฺถึ เทม อสฺสํ มหิสํ กุกฺกุฏํ สูกรํ เทมาติ วทนฺติ สมฺปฏิจฺฉิตุํ น วฏฺฏติ ฯ สเจ เกจิ มนุสฺสา อปฺโปสฺสุกฺกา ภนฺเต ตุมฺเห โหถ มยํ อิเม คเหตฺวา ตุมฺหากํ กปฺปิยภณฺฑํ ทสฺสามาติ วตฺวา คณฺหนฺติ วฏฺฏติ ฯ กุกฺกุฏสูกรา ยถาสุขํ ชีวนฺตูติ อรญฺเญ วิสฺสชฺเชตุํ วฏฺฏติ ฯ อิมํ ตฬากํ อิมํ เขตฺตํ อิมํ วตฺถุํ วิหารสฺส เทมาติ วุตฺเต ปฏิกฺขิปิตุํ น ลพฺภตีติ ฯ เสสเมตฺถ อุตฺตานตฺถเมวาติ ฯ