สงฺฆมชฺเฌ นิสฺสชฺชิตพฺพนฺติ เอตฺถ ยสฺมา รูปิยํ นาม อกปฺปิยํ ตสฺมา นิสฺสชฺชิตพฺพํ สงฺฆสฺส วา คณสฺส วา ปุคฺคลสฺส วาติ น วุตฺตํ ฯ ยสฺมา ปน ตํ ปฏิคฺคหิตมตฺตเมว น เตน กิญฺจิ กปฺปิยภณฺฑํ เจตาปิตํ ตสฺมา อุปาเยน ปริโภคทสฺสนตฺถํ สงฺฆมชฺเฌ นิสฺสชฺชิตพฺพนฺติ วุตฺตํ ฯ กปฺปิยํ อาจิกฺขิตพฺพํ สปฺปิ วาติ ปพฺพชิตานํ สปฺปิ วา เตลํ วา วฏฺฏติ อุปาสกาติ เอวํ อาจิกฺขิตพฺพํ ฯ รูปิยปฏิคฺคาหกํ ฐเปตฺวา สพฺเพเหว ปริภุญฺชิตพฺพนฺติ สพฺเพหิ ภาเชตฺวา ปริภุญฺชิตพฺพํ ฯ รูปิยปฏิคฺคาหเกน ภาโค น คเหตพฺโพ ฯ อญฺเญสํ ภิกฺขูนํ วา อารามิกานํ วา ปตฺตภาคํปิ ปฏิลภิตฺวา ปริภุญฺชิตุํ น วฏฺฏติ ฯ อนฺตมโส มกฺกฏาทีหิ ตโต หริตฺวา อรญฺเญ ฐปิตํ วา เตสํ หตฺถโต คลิตํ วา ติรจฺฉานปริคฺคหิตํปิ ปํสุกูลํปิ น วฏฺฏติเยว ฯ ตโต อาหเฏน ผาณิเตน เสนาสนธูปนํปิ น วฏฺฏติ ฯ สปฺปินา วา เตเลน วา ปทีปํ กตฺวา ทีปาโลเกน นิปชฺชิตุํ กสิณปริกมฺมํปิ กาตุํ โปตฺถกํปิ วาเจตุํ น วฏฺฏติ ฯ ตโต เตลมธุผาณิตาทีหิ ปน สรีเร วณํ มกฺเขตุํ น วฏฺฏติเยว ฯ เตน วตฺถุนา มญฺจปีฐาทีนิ วา คณฺหนฺติ อุโปสถาคารํ วา โภชนสาลํ วา กโรนฺติ ปริภุญฺชิตุํ น วฏฺฏติ ฯ ฉายาปิ เคหปริจฺเฉเทน ฐิตา น วฏฺฏติ ฯ ปริจฺเฉทาติกฺกนฺตา อาคนฺตุกตฺตา วฏฺฏติ ฯ ตํ วตฺถุํ วิสฺสชฺเชตฺวา กเตน มคฺเคนปิ เสตุนาปิ นาวายปิ อุฬุมฺเปนปิ คนฺตุํ น วฏฺฏติ ฯ เตน วตฺถุนา ขนาปิตาย โปกฺขรณิยา อุพฺภิโตทกํ ปาตุํ วา ปริภุญฺชิตุํ วา น วฏฺฏติ ฯ อนฺโต อุทเก ปน อสติ อญฺญํ อาคนฺตุกอุทกํ วา วสฺโสทกํ วา ปวิฏฺฐํ วฏฺฏติ ฯ กีตาย เยน อุทเกน สทฺธึ กีตา ตํ อาคนฺตุกํปิ น วฏฺฏติ ฯ ตํ วตฺถุํ อุปนิกฺเขปํ ฐเปตฺวา สงฺโฆ ปจฺจเย ปริภุญฺชติ เตปิ ปจฺจยา ตสฺส น วฏฺฏนฺติ ฯ อาราโม คหิโต โหติ โสปิ ปริภุญฺชิตุํ น วฏฺฏติ ฯ ยทิ ภูมิปิ พีชํปิ อกปฺปิยํ เนว ภูมึ น ผลํ ปริภุญฺชิตุํ วฏฺฏติ ฯ สเจ ภูมึเยว กีณิตฺวา อญฺญานิ พีชานิ โรปิตานิ ผลํ ปริภุญฺชิตุํ วฏฺฏติ ฯ อถ พีชานิ กีณิตฺวา กปฺปิยภูมิยํ โรปิตานิ ผลํ น วฏฺฏติ ฯ ภูมิยํ นิสีทิตุํ วา นิปชฺชิตุํ วา วฏฺฏติ ฯ สเจ โส ฉฑฺเฑตีติ ยตฺถ กตฺถจิ ขิปติ ฯ อถาปิ น ฉฑฺเฑติ สยํ วา คเหตฺวา คจฺฉติ น วาเรตพฺโพ ฯ โน เจ ฉฑฺเฑตีติ อถ เนว คเหตฺวา คจฺฉติ น ฉฑฺเฑติ กึ มยฺหํ อิมินา พฺยาปาเรนาติ เยน กามํ ปกฺกมติ ตโต ยถาวุตฺตลกฺขโณ รูปิยฉฑฺฑโก สมฺมนฺนิตพฺโพ ฯ โย น ฉนฺทาคตินฺติ อาทีสุ โลภวเสน ตํ วตฺถุํ อตฺตโน วา กโรนฺโต อตฺตานํ วา อุกฺกํเสนฺโต ฉนฺทาคตึ นาม คจฺฉติ ฯ โทสวเสน เนวายํ มาติกํ ชานาติ น วินยนฺติ ปรํ อปสาเทนฺโต โทสาคตึ นาม คจฺฉติ ฯ โมหวเสน มุฏฺฐปฺปมุฏฺฐสฺสติภาวํ อาปชฺชนฺโต โมหาคตึ นาม คจฺฉติ ฯ รูปิยปฏิคฺคาหกสฺส ภเยน ฉฑฺเฑตุํ อวิสหนฺโต ภยาคตึ นาม คจฺฉติ ฯ เอวํ อกโรนฺโต น ฉนฺทาคตึ คจฺฉติ ฯเปฯ น ภยาคตึ คจฺฉตีติ เวทิตพฺโพ ฯ {๕๘๕} อนิมิตฺตํ กตฺวาติ นิมิตฺตํ อกตฺวา ฯ อกฺขีนิ นิมฺมิเลตฺวา นทิยา วา ปปาเต วา วนคหเน วา คูถกํ วิย อนเปกฺเขน ปติโตกาสํ อสมนฺนาหรนฺเตน ปาเตตพฺพนฺติ อตฺโถ ฯ เอวํ ชิคุจฺฉิตพฺเพปิ รูปิเย ภควา ปริยาเยน ภิกฺขูนํ ปริโภคํ อาจิกฺขิ ฯ รูปิยปฏิคฺคาหกสฺส ปน เกนจิ ปริยาเยน ตโต อุปฺปนฺนปจฺจยปริโภโค น วฏฺฏติ ฯ ยถา จายํ เอตสฺส น วฏฺฏติ เอวํ อสนฺตสมฺภาวนาย วา กุลทูสกกมฺเมน วา กุหนาทีหิ วา อุปฺปนฺนปจฺจยา เนว ตสฺส น อญฺญสฺส วฏฺฏนฺติ ฯ ธมฺเมน สเมน อุปฺปนฺนาปิ อปจฺจเวกฺขิตฺวา ปริภุญฺชิตุํ น วฏฺฏนฺติ ฯ