อปเรปิ จตฺตาโร ปริโภคา ลชฺชิปริโภโค อลชฺชิปริโภโค ธมฺมิยปริโภโค อธมฺมิยปริโภโคติ ฯ ตตฺถ อลชฺชิโน ลชฺชินา สทฺธึ ปริโภโค วฏฺฏติ ฯ อาปตฺติยา น กาเรตพฺโพ ฯ ลชฺชิโน อลชฺชินา สทฺธึ ยาว น ชานาติ ตาว วฏฺฏติ ฯ อาทิโต ปฏฺฐาย หิ อลชฺชี นาม นตฺถิ ฯ ตสฺมา ยทาสฺส อลชฺชิภาวํ ชานาติ ตทา วตฺตพฺโพ ตุมฺเห กายทฺวาเร จ วจีทฺวาเร จ วีติกฺกมํ กโรถ ตํ อปฏิรูปํ มา เอวํ อกริตฺถาติ ฯ สเจ อนาทยิตฺวา กโรติเยว ยทิ เตน สทฺธึ ปริโภคํ กโรติ โสปิ อลชฺชีเยว โหติ ฯ โยปิ อตฺตโน ภารภูเตน อลชฺชินา สทฺธึ ปริโภคํ กโรติ โสปิ นิวาเรตพฺโพ ฯ สเจ น โอรมติ อยํปิ อลชฺชีเยว โหติ ฯ เอวํ เอโกปิ อลชฺชี อลชฺชิสตํปิ กโรติ ฯ อลชฺชิโน ปน อลชฺชินาว สทฺธึ ปริโภเค อาปตฺติ นาม นตฺถิ ฯ ลชฺชิโน ลชฺชินา สทฺธึ ปริโภโค ทฺวินฺนํ ขตฺติยกุมารานํ สุวณฺณปาฏิยํ โภชนสทิโส ฯ ธมฺมิยาธมฺมิยปริโภโค ปจฺจยวเสเนว เวทิตพฺโพ ฯ ตตฺถ สเจ ปุคฺคโลปิ อลชฺชี ปิณฺฑปาโตปิ อธมฺมิโย อุโภ เชคุจฺฉา ฯ ปุคฺคโล อลชฺชี ปิณฺฑปาโต ธมฺมิโย ปุคฺคลํ ชิคุจฺฉิตฺวา ปิณฺฑปาโต น คเหตพฺโพ ฯ มหาปจฺจริยํ ปน ทุสฺสีโล สงฺฆโต อุทฺเทสภตฺตาทีนิ ลภิตฺวา สงฺฆสฺเสว เทติ เอตานิ ยถาทานเมว คตตฺตา วฏฺฏนฺตีติ วุตฺตํ ฯ ปุคฺคโล ลชฺชี ปิณฺฑปาโต อธมฺมิโย ปิณฺฑปาโต ชิคุจฺโฉ น คเหตพฺโพ ฯ ปุคฺคโล ลชฺชี ปิณฺฑปาโตปิ ธมฺมิโย วฏฺฏติ ฯ

อปเร เทฺว ปคฺคหา เทฺว จ ปริโภคา ลชฺชิปคฺคโห อลชฺชิปคฺคโห ธมฺมปริโภโค อามิสปริโภโคติ ฯ ตตฺถ อลชฺชิโน ลชฺชึ ปคฺคเหตุํ วฏฺฏติ ฯ น โส อาปตฺติยา กาเรตพฺโพ ฯ สเจ ปน ลชฺชี อลชฺชึ ปคฺคณฺหาติ อนุโมทนาย อชฺเฌสติ ธมฺมกถาย อชฺเฌสติ กุเลสุ อุปตฺถมฺเภติ อิตโรปิ อมฺหากํ อาจริโย อีทิโส จ อีทิโส จาติ ตสฺส ปริสติ วณฺณํ ภาสติ อยํ สาสนํ โอสกฺกาเปติ อนฺตรธาเปตีติ เวทิตพฺโพ ฯ ธมฺมปริโภคอามิสปริโภเคสุ ปน ยตฺถ อามิสปริโภโค วฏฺฏติ ตตฺถ ธมฺมปริโภโคปิ วฏฺฏติ ฯ โย ปน โกฏิยํ ฐิโต คณฺโฐ ตสฺส ปุคฺคลสฺส อจฺจเยน นสฺสิสฺสติ ตํ ธมฺมานุคฺคเหน อุคฺคณฺหิตุํ วฏฺฏตีติ วุตฺตํ ฯ ตตฺรีทํ วตฺถุ มหาภเย กิร เอกสฺเสว ภิกฺขุโน มหานิทฺเทโส ปคุโณ อโหสิ ฯ อถ จตุนฺนิกายิกติสฺสตฺเถรสฺส อุปชฺฌาโย มหาติปิฏกตฺเถโร นาม มหารกฺขิตตฺเถรํ อาห อาวุโส มหารกฺขิต เอตสฺส สนฺติเก มหานิทฺเทสํ คณฺหาหีติ ฯ ปาโป กิรายํ ภนฺเต น คณฺหามีติ ฯ คณฺหาวุโส อหนฺเต สนฺติเก นิสีทิสฺสามีติ ฯ สาธุ ภนฺเต ตุมฺเหสุ นิสินฺเนสุ อุคฺคณฺหิสฺสามีติ ปฏฺฐเปตฺวา รตฺตินฺทิวํ นิรนฺตรํ ปริยาปุณนฺโต โอสานทิวเส เหฏฺฐามญฺเจ อิตฺถึ ทิสฺวา ภนฺเต สุตํเยว เม ปุพฺเพ สจาหํ เอวํ ชาเนยฺยํ น อีทิสสฺส สนฺติเก ธมฺมํ ปริยาปุเณยฺยนฺติ อาห ฯ ตสฺส ปน สนฺติเก พหู มหาเถรา อุคฺคณฺหิตฺวา มหานิทฺเทสํ ปติฏฺฐเปสุํ ฯ