เอวํ อกตฺวา ตํ ทสาหํ อติกฺกามยโต นิสฺสคฺคิยํ ปาจิตฺติยนฺติ ตํ สตฺตวิธํปิ ปตฺตํ ทสาหปรมํ กาลํ อติกฺกามยโต นิสฺสคฺคิยํ ปาจิตฺติยํ ฯ {๖๐๗} นิสฺสคฺคิยํ ปตฺตํ อนิสฺสชฺชิตฺวา ปริภุญฺชตีติ ยาคุํ ปิวิตฺวา โธเต ทุกฺกฏํ ชชฺชกํ ขาทิตฺวา ภตฺตํ ภุญฺชิตฺวา โธเต ทุกฺกฏนฺติ เอวํ ปโยเค ปโยเค ทุกฺกฏํ ฯ

{๖๐๘} อนาปตฺติ อนฺโตทสาหํ อธิฏฺเฐติ วิกปฺเปตีติ เอตฺถ ปน ปมาณยุตฺตสฺสาปิ อธิฏฺฐานวิกปฺปนูปคตฺตํ เอวํ เวทิตพฺพํ ฯ อโยปตฺโต ปญฺจหิ ปาเกหิ มตฺติกาปตฺโต ทฺวีหิ ปาเกหิ ปกฺโก อธิฏฺฐานูปโค ฯ อุโภปิ ยํ มูลํ ทาตพฺพํ ตสฺมึ ทินฺเนเยว สเจ เอโกปิ ปาโก อูโน โหติ กากณิกมตฺตํปิ วา มูลํ อทินฺนํ น อธิฏฺฐานูปคา ฯ สเจ ปตฺตสฺสามิโก วทติ ยทา ตุมฺหากํ มูลํ ภวิสฺสติ ตทา ทสฺสถ อธิฏฺฐหิตฺวา ปริภุญฺชถาติ ฯ เนว อธิฏฺฐานูปโค โหติ ฯ ปากสฺส หิ อูนตฺตา ปตฺตสงฺขฺยํ น คจฺฉติ มูลสฺส สกลสฺส วา เอกเทสสฺส วา อทินฺนตฺตา สกภาวํ น อุเปติ อญฺญสฺเสว สนฺตโก โหติ ตสฺมา ปาเก จ มูเล จ นิฏฺฐิเตเยว อธิฏฺฐานูปโค โหติ ฯ โย อธิฏฺฐานูปโค เสฺวว วิกปฺปนูปโค ฯ โส หตฺถํ อาคโตปิ อนาคโตปิ อธิฏฺฐาตพฺโพ วิกปฺเปตพฺโพ วา ฯ ยทิ หิ ปตฺตการโก มูลํ ลภิตฺวา สยํ วา ทาตุกาโม หุตฺวา อหํ ภนฺเต ตุมฺหากํ ปตฺตํ กตฺวา อสุกทิวเส นาม ปจิตฺวา ฐเปสฺสามีติ วทติ ภิกฺขุ จ เตน ปริจฺฉินฺนทิวสโต ทสาหํ อติกฺกาเมติ นิสฺสคฺคิยํ ปาจิตฺติยํ ฯ สเจ ปน ปตฺตการโก อหํ ตุมฺหากํ ปตฺตํ กตฺวา ปจิตฺวา สาสนํ เปเสสฺสามีติ วตฺวา ตเถว กโรติ เตน เปสิตภิกฺขุ ปน ตสฺส ภิกฺขุโน น อาโรเจติ อญฺโญ ทิสฺวา วา สุตฺวา วา ตุมฺหากํ ภนฺเต ปตฺโต นิฏฺฐิโตติ อาโรเจติ เอตสฺส อาโรจนํ นปฺปมาณํ ฯ ยทา ปน เตน เปสิโตเยว อาโรเจติ ตสฺส วจนํ สุตทิวสโต ปฏฺฐาย ทสาหํ อติกฺกามยโต นิสฺสคฺคิยํ ปาจิตฺติยํ ฯ สเจ ปตฺตการโก อหํ ตุมฺหากํ ปตฺตํ กตฺวา ปจิตฺวา กสฺสจิ หตฺเถ ปหิณิสฺสามีติ วตฺวา ตเถว กโรติ ปตฺตํ คเหตฺวา อาคตภิกฺขุ ปน อตฺตโน ปริเวเณ ฐเปตฺวา ตสฺส น อาโรเจติ อญฺโญ โกจิ ภณติ อปิ ภนฺเต อธุนา อาคโต ปตฺโต สุนฺทโรติ กุหึ อาวุโส ปตฺโตติ อิตฺถนฺนามสฺส หตฺเถ เปสิโตติ เอตสฺสปิ วจนํ นปฺปมาณํ ฯ ยทา ปน โส ภิกฺขุ ปตฺตํ เทติ ลทฺธทิวสโต ปฏฺฐาย ทสาหํ อติกฺกามยโต นิสฺสคฺคิยํ ปาจิตฺติยํ ฯ ตสฺมา ทสาหํ อนติกฺกมิตฺวา อธิฏฺฐาตพฺโพ วิกปฺเปตพฺโพ วา ฯ