{๖๓๑} เตน สมเยนาติ จีวรอจฺฉินฺทนสิกฺขาปทํ ฯ ตตฺถ ยํปิ ตฺยาหนฺติ ยํปิ เต อหํ ฯ โส กิร มม ปตฺตจีวรอุปาหนปจฺจตฺถรณาทีนิ วหนฺโต มยา สทฺธึ จาริกํ ปกฺกมิสฺสตีติ อทาสิ ฯ เตเนวมาห ฯ อจฺฉินฺทีติ พลกฺกาเรน อคฺคเหสิ ฯ สกสญฺญาย คหิตตฺตา ปนสฺส ปาราชิกํ นตฺถิ ฯ กิลเมตฺวา คหิตตฺตา อาปตฺติ ปญฺญตฺตา ฯ {๖๓๓} สยํ อจฺฉินฺทติ นิสฺสคฺคิยํ ปาจิตฺติยนฺติ เอกํ จีวรํ เอกาพทฺธานิ จ พหูนิ อจฺฉินฺทโต เอกา อาปตฺติ ฯ เอกโต อพทฺธานิ วิสุํ ฐิตานิ จ พหูนิ อจฺฉินฺทโต สงฺฆาฏึ อาหร อุตฺตราสงฺคํ อาหราติ เอวํ

มยา ทินฺนานิ สพฺพานิ อาหราติ วทโตปิ เอกวจเนเนว สมฺพหุลา อาปตฺติโย ฯ อญฺญํ อาณาเปติ อาปตฺติ ทุกฺกฏสฺสาติ จีวรํ คณฺหาติ อาณาเปติ เอกํ ทุกฺกฏํ ฯ อาณตฺโต พหูนิ คณฺหาติ เอกํ ปาจิตฺติยํ ฯ สงฺฆาฏึ คณฺห อุตฺตราสงฺคํ คณฺหาติ วทโต วาจาย วาจาย ทุกฺกฏํ ฯ มยา ทินฺนานิ สพฺพานิ คณฺหาติ วทโต เอกวาจาย สมฺพหุลา อาปตฺติโย ฯ {๖๓๔} อญฺญํ ปริกฺขารนฺติ วิกปฺปนูปคํ ปจฺฉิมํ จีวรํ ฐเปตฺวา ยงฺกิญฺจิ อนฺตมโส สูจึปิ ฯ เวเฐตฺวา ฐปิตสูจีสุปิ วตฺถุคณนาย ทุกฺกฏานิ ฯ สิถิลเวฐิตาสุ เอวํ ฯ คาฬฺหํ กตฺวา พทฺธาสุ ปน เอกเมว ทุกฺกฏนฺติ มหาปจฺจริยํ วุตฺตํ ฯ สูจิฆเร ปกฺขตฺตาสุปิ เอเสว นโย ฯ ถวิกาย ปกฺขิปิตฺวา สิถิลพทฺธคาฬฺหพทฺเธสุ ติกฏุกาทิเภสชฺเชสุปิ เอเสว นโย ฯ {๖๓๕} โส วา เทตีติ ภนฺเต ตุมฺหากํเยว อิทํ สารุปฺปนฺติ เอวํ วา เทติ ฯ อถวา เตน ปน อาวุโส มยํ ตุยฺหํ วตฺตปฏิปตฺตึ กริสฺสติ อมฺหากํ สนฺติเก อุปชฺฌํ คณฺหิสฺสติ ธมฺมํ ปริยาปุณิสฺสตีติ จีวรํ อทมฺหา โส ทานิ ตฺวํ น วตฺตํ กโรสิ น อุปชฺฌํ คณฺหาสิ น ธมฺมํ ปริยาปุณาสีติ เอวมาทีนิ วุตฺโต ภนฺเต จีวรตฺถาย มญฺเญ ภณถ อิทํ โว จีวรนฺติ เทติ ฯ เอวํปิ โส วา เทติ ฯ ทิสาปกฺกนฺตํ วา ปน ทหรํ นิวตฺเตถ นนฺติ ภณติ ฯ โส น นิวตฺตติ ฯ จีวรํ คเหตฺวา รุนฺธถาติ ฯ เอวํ เจ นิวตฺตติ สาธุ ฯ สเจ ปตฺตจีวรตฺถาย มญฺเญ ตุมฺเห ภณถ คณฺหาถ นนฺติ เทติ จ เอวํปิ โสเยว วา เทติ ฯ วิพฺภนฺตํ วา ทิสฺวา มยํ ตุยฺหํ วตฺตํ กริสฺสตีติ ปตฺตจีวรํ อทมฺหา โส ทานิ ตฺวํ วิพฺภมิตฺวา จรสีติ วทติ ฯ อิตโร คณฺหาถ ตุมฺหากํ ปตฺตจีวรนฺติ เทติ ฯ เอวมฺปิ โสเยว วา เทติ ฯ มม สนฺติเก อุปชฺฌํ คณฺหนฺตสฺเสว เต เทมิ อญฺญตฺถ คณฺหนฺตสฺส น เทมิ วตฺตํ กโรนฺตสฺเสว เทมิ อกโรนฺตสฺส น เทมิ ธมฺมํ ปริยาปุณนฺตสฺเสว เทมิ อปริยาปุณนฺตสฺส น เทมิ อวิพฺภมนฺตสฺเสว เทมิ วิพฺภมนฺตสฺส น เทมีติ เอวมฺปน ทาตุํ น วฏฺฏติ ฯ ททโต ทุกฺกฏํ ฯ อาหราเปตุํ ปน วฏฺฏติ ฯ จชิตฺวา ทินฺนํ อจฺฉินฺทิตฺวา คณฺหนฺโต ภณฺฑคฺเฆน กาเรตพฺโพ ฯ เสสเมตฺถ อุตฺตานเมวาติ ฯ