{๓๖} ตติยสิกฺขาปเท ฯ ภณฺฑนชาตานนฺติ สญฺชาตภณฺฑนานํ ฯ ภณฺฑนนฺติ กลหสฺส ปุพฺพภาโค ฯ อิมินา จ อิมินา จ อิทํ กตนฺติ เอวํ วุตฺเต เอวํ วกฺขามาติ อาทิกํ สกสกปกฺเข สมฺมนฺตนํ ฯ กลโหติ อาปตฺติคามิโก กายวาจาวีติกฺกโม ฯ วิวาโทติ วิคฺคาหิกกถา ฯ ตํ วิวาทํ อาปนฺนานํ วิวาทาปนฺนานํ ฯ เปสุญฺญนฺติ ปิสุณวาจํ ฯ ปิยภาวสฺส สุญฺญกรณวาจนฺติ วุตฺตํ โหติ ฯ {๓๗} ภิกฺขุเปสุญฺเญติ ภิกฺขูนํ เปสุญฺเญ ภิกฺขุโต สุตฺวา ภิกฺขุนา ภิกฺขุสฺส อุปสํหฏเปสุญฺเญติ อตฺโถ ฯ {๓๘} ทฺวีหิ อากาเรหีติ ทฺวีหิ การเณหิ ฯ ปิยกมฺยสฺส วาติ เอวํ อหํ เอตสฺส ปิโย ภวิสฺสามีติ อตฺตโน ปิยภาวํ ปฏฺฐยมานสฺส วา ฯ เภทาธิปฺปายสฺส วาติ เอวํ อยํ เอเตน สทฺธึ ภิชฺชิสฺสตีติ ปรสฺส ปเรน เภทํ อิจฺฉนฺตสฺส วา ฯ ชาติโต วาติ อาทิ สพฺพํ ปุริมสิกฺขาปเท วุตฺตนยเมว ฯ อิธาปิ ภิกฺขุนึ อาทึ กตฺวา สพฺเพ อนุปสมฺปนฺนา นาม ฯ น ปิยกมฺยสฺส น เภทาธิปฺปายสฺสาติ เอกํ อกฺโกสนฺตํ เอกญฺจ ขมนฺตํ ทิสฺวา อโห นิลฺลชฺโช อีทิสํปิ นาม ภวนฺตํ ปุน วตฺตพฺพํ มญฺญิสฺสตีติ เอวํ เกวลํ ปาปครหิตาย ภณนฺตสฺส อนาปตฺติ ฯ เสสํ อุตฺตานตฺถเมว ฯ ติสมุฏฺฐานํ กายจิตฺตโต วาจาจิตฺตโต กายวาจาจิตฺตโต จ สมุฏฺฐาติ กิริยา สญฺญาวิโมกฺขํ สจิตฺตกํ โลกวชฺชํ กายกมฺมํ วจีกมฺมํ อกุสลจิตฺตํ ติเวทนนฺติ ฯ

เปสุญฺญสิกฺขาปทํ ตติยํ ฯ