{๖๐} สตฺตมสิกฺขาปเท ฯ ฆรณีติ ฆรสฺสามินี ฯ นิเวสนทฺวาเรติ นิเวสนสฺส มหาทฺวาเร ฯ ฆรสุณฺหาติ ตสฺมึ ฆเร สุณฺหา ฯ อาวสถทฺวาเรติ โอวรกทฺวาเร ฯ วิสฏฺเฐนาติ สุนิคฺคเตน สทฺเทน ฯ วิวเฏนาติ สุฏฺฐุปฺปกาเสน อสํวุเตน ฯ ธมฺโม เทเสตพฺโพติ อยํ สรณสีลาทิเภโท ธมฺโม กเถตพฺโพ ฯ อญฺญาตุนฺติ อาชานิตุํ ฯ วิญฺญุนา ปุริสวิคฺคเหนาติ วิญฺญุนา ปุริเสน ปุริสวิคฺคหํ คเหตฺวาปิ ฐิเตน น ยกฺเขน น เปเตน น ติรจฺฉานคเตน ฯ {๖๖} อนาปตฺติ วิญฺญุนา ปุริสวิคฺคเหนาติ วิญฺญุนา ปุริสวิคฺคเหน สทฺธึ ฐิตาย พหุํปิ ธมฺมํ เทเสนฺตสฺส อนาปตฺติ ฯ ฉปฺปญฺจวาจาหีติ ฉหิ ปญฺจหิ วาจาหิ โย เทเสติ ตสฺสาปิ อนาปตฺติ ฯ ตตฺถ เอโก คาถาปาโท เอกา วาจาติ เอวํ สพฺพตฺถ วาจาปมาณํ เวทิตพฺพํ ฯ สเจ อฏฺฐกถํ ธมฺมปทชาตกาทิวตฺถุํ วา กเถตุกาโม โหติ ฉปฺปญฺจปทมตฺตเมว กเถตุํ วฏฺฏติ ฯ ปาลิยา สทฺธึ กเถนฺเตน เอกํ ปทํ ปาลิโต ปญฺจ อฏฺฐกถาโตติ เอวํ ฉปฺปทานิ อนติกฺกมิตฺวาว กเถตพฺโพ ฯ ปทโส ธมฺเม วุตฺตปฺปเภโท หิ อิธาปิ สพฺโพ ธมฺโมเยว ฯ ตสฺมึ เทเสตีติ ตสฺมึ ขเณ เทเสติ ฯ สามิอตฺเถ วา เอตํ ภุมฺมวจนํ ตสฺสา เทเสตีติ อตฺโถ ฯ อญฺญสฺส มาตุคามสฺสาติ เอกิสฺสา เทเสตฺวา ปุน อาคตาคตาย อญฺญสฺสาปิ เทเสตีติ เอวํ เอกาสเน นิสินฺโน มาตุคามสตสฺสาปิ เทเสตีติ อตฺโถ ฯ มหาปจฺจริยฏฺฐกถายํ วุตฺตํ สนฺนิสินฺนานํ มาตุคามานํ ตุมฺหากํ เอเกกิสฺสา เอเกกํ คาถํ เทเสมิ ตํ สุณาถาติ เทเสติ อนาปตฺติ ฯ ปฐมํ เอเกกิสฺสา เอเกกํ คาถํ กถิสฺสามีติ อาโภคํ กตฺวา ชานาเปตฺวา กเถตุํ วฏฺฏตีติ ฯ ปญฺหํ ปุจฺฉติ ปญฺหํ ปุฏฺโฐ กเถตีติ มาตุคาโม ภนฺเต ทีฆนิกาโย นาม กิมตฺถํ ทีเปตีติ ปุจฺฉติ เอวํ ปญฺหํ ปุฏฺโฐ ภิกฺขุ สพฺพญฺเจปิ ทีฆนิกายํ กเถติ อนาปตฺติ ฯ เสสเมตฺถ อุตฺตานเมวาติ ฯ ปทโสธมฺมสมุฏฺฐานํ วาจโต จ วาจาจิตฺตโต จ สมุฏฺฐาติ กิริยากิริยํ โนสญฺญาวิโมกฺขํ อจิตฺตกํ ปณฺณตฺติวชฺชํ วจีกมฺมํ ติจิตฺตํ ติเวทนนฺติ ฯ

ธมฺมเทสนาสิกฺขาปทํ สตฺตมํ ฯ