{279} Tatiyasikkhāpade. Sayanīghareti sayanaghare. Yato ayyassa bhikkhā dinnāti yasmā bhikkhā dinnā. Yaṃ āgatena laddhabbaṃ taṃ vo laddhaṃ gacchathāti adhippāyo. Pariyuṭṭhitoti rāgāpariyuṭṭhito methunādhippāyoti attho. {280} Sabhojaneti saha ubhohi janehi sabhojanaṃ. Tasmiṃ sabhojane. Athavā sabhojaneti sabhoge. Rāgapariyuṭṭhitassa purisassa hi itthī bhogā itthiyā ca puriso. Tenevassa padabhājane itthī ceva hoti puriso cātiādi vuttaṃ. Mahallake ghareti mahallake sayanīghare. Piṭṭhisaṅghāṭassa hatthapāsaṃ vijahitvāti tassa sayanīghare gabbhassa yo piṭṭhisaṅghāṭo tassa hatthapāsaṃ vijahitvā antosayanassa āsanne ṭhāne nisīdatīti attho. Īdisaṃ ca sayanīgharaṃ mahācatussālādīsu hoti. Piṭṭhivaṃsaṃ atikkamitvāti iminā majjhātikkamaṃ dasseti. Tasmā yathā vā tathā vā katassa khuddakassa sayanīgharassa majjhātikkame āpatti veditabbā. Sesamettha uttānameva. Paṭhamapārājikasamuṭṭhānaṃ kiriyā saññāvimokkhaṃ sacittakaṃ lokavajjaṃ kāyakammaṃ akusalacittaṃ dvivedananti.

Sabhojanasikkhāpadaṃ tatiyaṃ.