{78} Navamasikkhāpade. Duṭṭhullā nāma āpatti cattāri pārājikāni terasa ca saṅghādisesāti imissā pāliyā pārājikāni duṭṭhullasaddadassanatthaṃ vuttāni saṅghādisesaṃ pana idhādhippetanti aṭṭhakathāsu vuttaṃ. Tatrāyaṃ vicāraṇā. Sace pārājikaṃ ārocentassa pācittiyaṃ na bhaveyya. Yathā samānepi bhikkhubhikkhunīnaṃ upasampannasadde yattha bhikakhunī anadhippetā hoti tattha bhikkhuṃ ṭhapetvā avaseso anupasampannoti vuccati evamidha samānepi pārājikasaṅghādisesānaṃ duṭṭhullasadde yadi pārājikaṃ anadhippetaṃ duṭṭhullā nāma āpatti terasa saṅghādisesāti etadeva vattabbaṃ siyā. Tattha bhaveyya yo pārājikaṃ āpanno so bhikkhubhāvato cuto tasmā tassa āpattiṃ ārocento dukkaṭaṃ āpajjatīti. Evaṃ sati akkosantopi dukkaṭaṃ āpajjeyya pācittiyameva ca āpajjatīti. Vuttaṃ hetaṃ asuddho hoti puggalo aññataraṃ pārājikaṃ dhammaṃ ajjhāpanno tañce suddhadiṭṭhi samāno okāsaṃ kārāpetvā akkosādhippāyo vadati āpatti omasavādassāti. Evaṃ pāliyā vicārayamānāya pārājikaṃ ārocentassāpi pācittiyameva dissati. Kiñcāpi dissati athakho sabbaaṭṭhakathāsu vuttattā aṭṭhakathācariyāva

Ettha pamāṇaṃ. Na aññāpi vacāraṇā. Pubbepi avocumha

buddhena dhammo vinayo ca vutto

yo tassa puttehi tatheva ñātoti ādi.