{89} Senāsanavaggassa paṭhamasikkhāpade. Anādiyantoti tassā vacanaṃ aggaṇhanto. Dārakassa bāhuṃ ākoṭṭesīti ukkhittapharasuṃ niggahetuṃ asakkonto manussānaṃ cakkhuvisayātikkante cātummahārājasantikā laddhe rukkhaṭṭhakadibbavimāne nipannassa dārakassa bāhuṃ thanamūleyeva chindi. Na kho panetaṃ paṭirūpanti ādimhi ayaṃ Saṅkhepavaṇṇanā. Himavante kira pakkhadivasesu devatāsannipāto hoti tattha rukkhadhammaṃ pucchanti tvaṃ rukkhadhamme ṭhitā na ṭhitāti. Rukkhadhammo nāma rukkhe chijjamāne rukkhadevatāya manopadosassa akaraṇaṃ. Tattha yā devatā rukkhadhamme aṭṭhitā hoti sā devatā sannipātaṃ pavisituṃ na labhati. Iti sā devatā imañca rukkhadhamme aṭṭhānapaccayaṃ ādīnavaṃ addasa bhagavato ca sammukhā sutapubbadhammadesanānusārena tathāgatassa chaddantādikāle pubbacaritaṃ anussari. Tenassā etadahosi nakho panetaṃ paṭirūpaṃ .pe. Jīvitā voropeyyanti. Yannūnāhaṃ bhagavato etamatthaṃ āroceyyanti idaṃ panassā ayaṃ bhikkhu sapitiko putto addhā bhagavā imassa imaṃ ajjhācāraṃ sutvā mariyādaṃ bandhissati sikkhāpadaṃ paññāpessatīti iti paṭisañcikkhantiyā ahosi. Sacajja tvaṃ devateti sace ajja tvaṃ devate. Pasaveyyāsīti janeyyāsi uppādeyyāsi. Evañca pana vatvā bhagavā taṃ devataṃ saññāpento

yo ve uppatitaṃ kodhaṃ rathaṃ bhantaṃva dhāraye

tamahaṃ sārathiṃ brūmi rasmiggāho itaro janoti imaṃ gāthaṃ abhāsi. Gāthāpariyosāne sā devatā sotāpattiphale patiṭṭhāsi. Puna bhagavā sampattaparisāya dhammaṃ desento

yo ve uppatitaṃ vineti kodhaṃ