Aṭṭhakathācariyā hi buddhassa adhippāyaṃ jānanti. Imināpi cetaṃ pariyāyena veditabbaṃ. Aññatra bhikkhusammatiyāti hi vuttaṃ. Bhikkhusammatiyā ca ārocanaṃ āyatiṃ saṃvaratthāya puna tathārūpaṃ āpattiṃ anāpajjanatthāya bhagavatā anuññātaṃ na ca tassa bhikkhuno avaṇṇamattappākāsanatthāya na ca sāsane tassa patiṭṭhānisedhanatthāya na ca pārājikaṃ āpannassa puna tathārūpāya āpattiyā anāpajjanena bhikkhubhāvo nāma atthi tasmā pārājikāni duṭṭhullasaddadassanatthaṃ vuttāni saṅghādisesaṃ pana idhādhippetanti yaṃ aṭṭhakathāsu vuttaṃ taṃ suvuttaṃ. {80} Atthi bhikkhusammati āpattipariyantāti ādīsu pana yā ayaṃ bhikkhusammati vuttā sā na katthaci āgatā idha vuttattāyeva pana abhiṇhāpattikaṃ bhikkhuṃ disvā evamesa paresu hirottappenāpi āyatiṃ saṃvaraṃ āpajjissatīti tassa bhikkhuno hitesitāya tikkhattuṃ apaloketvā saṅghena kātabbāti veditabbā.

{82} Aduṭṭhullaṃ āpattiṃ āroceti āpatti dukkaṭassāti pañcapi āpattikkhandhe ārocentassa dukkaṭaṃ. Mahāpaccariyaṃ pārājikaṃ ārocentassāpi dukkaṭameva vuttaṃ. Anupasampannassa duṭṭhullaṃ vā aduṭṭhullaṃ vā ajjhācāranti ettha ādito pañca sikkhāpadāni duṭṭhullo nāma ajjhācāro sesāni aduṭṭhulalo. Sukkavisaṭṭhikāyasaṃsaggaduṭṭhullaattakāmā panassa ajjhācāro nāmāti vuttaṃ.

{83} Vatthuṃ ārocetīti ayaṃ sukkavisaṭṭhiṃ āpanno kāyasaṃsaggaṃ āpanno duṭṭhullaṃ āpanno attakāmaṃ āpannoti evaṃ vadantassa anāpatti. Āpattiṃ ārocetīti ayaṃ pārājikaṃ āpanno saṅghādisesaṃ āpanno thullaccayaṃ āpanno pācittiyaṃ pāṭidesanīyaṃ dukkaṭaṃ dubbhāsitaṃ āpannoti vadati anāpatti. Ayaṃ asuciṃ mocetvā saṅghādisesaṃ āpannoti ādinā nayena vatthunā saddhiṃ āpattiṃ ghaṭetvā ārocentasseva āpatti. Sesamettha uttānameva. Tisamuṭṭhānaṃ kāyacittato vācācittato kāyavācācittato ca samuṭṭhāti kiriyā saññāvimokkhaṃ sacittakaṃ lokavajjaṃ kāyakammaṃ vacīkammaṃ akusalacittaṃ dukkhavedananti.