{87} Khanati vā khanāpeti vāti antamaso pādaṅguṭṭhakenapi sammajjanīsalākāyapi sayaṃ vā khanati aññena vā khanāpeti. Bhindati vā bhindāpeti vāti antamaso udakampi chaḍḍento sayaṃ vā bhindati aññena vā bhedāpeti. Dahati vā dahāpeti vāti antamaso pattaṃ pacanto sayaṃ vā dahati aññena vā dahāpeti. Yattakesu ṭhānesu aggiṃ deti vā dāpeti vā tattakāni pācittiyāni. Pattaṃ pacantenapi pubbe pakkaṭṭhāneyeva pacitabbo. Adaḍḍhāya paṭhaviyā ṭhapetuṃ na vaṭṭati. Pattapacanakapālassa pana upari aggiṃ ṭhapetuṃ na vaṭṭati. Dārūnaṃ upari ṭhapeti so aggi tāni dahanto gantvā paṭhaviṃ dahati na vaṭṭati. Iṭṭhakapāsāṇādīsupi eseva nayo. Tatrāpi hi iṭṭhakādīnaṃyeva upari ṭhapetuṃ vaṭṭati. Kasmā. Tesaṃ anupādānattā. Na hi tāni aggissa upādānasaṅkhayaṃ gacchanti. Sukkhakhāṇusukkharukkhādīsupi aggiṃ dātuṃ na vaṭṭati. Sace pana paṭhaviṃ appattameva nibbāpetvā gamissāmīti deti vaṭṭati. Pacchā nibbāpetuṃ na sakkoti avisayattā anāpatti. Tiṇukkaṃ gahetvā gacchanto hatthe ḍayhamāne bhūmiyaṃ pāteti anāpatti. Patitaṭṭhāneyeva upādānaṃ datvā aggiṃ kātuṃ vaṭṭatīti mahāpaccariyaṃ vuttaṃ. Daḍḍhapaṭhaviyā ca yattakaṃ ṭhānaṃ usumāya anugataṃ sabbaṃ vikopetuṃ vaṭṭatīti tattheva vuttaṃ. Yo pana ajānanako bhikkhu araṇisahitena aggiṃ nibbattetvā hatthena ukkhipitvā kiṃ karomīti vadati jālehīti vattabbo. Hattho me ḍayhatīti vadati yathā na ḍayhati tathā karohīti vattabbo. Bhūmiyaṃ pātehīti pana na vattabbo. Sace hatthe ḍayhamāne pāteti paṭhaviṃ ḍayhissāmīti apātitattā anāpatti. Patitaṭṭhāne pana aggiṃ kātuṃ vaṭṭatīti kurundiyaṃ vuttaṃ. {88} Anāpatti imaṃ jānāti ādīsu pana imassa thambhassa āvāṭaṃ jāna mahāmattikaṃ jāna thusamattikaṃ jāna mahāmattikaṃ dehi thusamattikaṃ dehi mattikaṃ āhara paṃsuṃ āhara mattikāya attho paṃsunā attho imassa thambhassa āvāṭaṃ kappiyaṃ karohi imaṃ mattikaṃ kappiyaṃ karohi imaṃ paṃsuṃ kappiyaṃ karohīti evamattho veditabbo. Asañciccāti pāsāṇarukkhādīni vā pavaṭṭentassa Kattaradaṇḍena vā āhacca āhacca gacchantassa paṭhavī bhijjati. Sā tena bhindissāmīti evaṃ sañcicca abhinnattā asañcicca bhinnā nāma hoti. Iti asañcicca bhindantassa anāpatti. Asatiyāti aññāvihito kenaci saddhiṃ kiñci kathento pādaṅguṭṭhakena vā kattarayaṭṭhiyā vā paṭhaviṃ vilikhanto tiṭṭhati. Evaṃ asatiyā vilikhantassa vā bhindantassa vā anāpatti. Ajānantassāti antogehe ovuṭṭhaṃ channaṃ paṭhaviṃ akappiyapaṭhavīti na jānāti kappiyapaṭhavīti saññāya vikopeti khanāmi bhindāmi dahāmīti vā na jānāti kevalaṃ saṅgopanatthāya khanittādīni vā ṭhapeti ḍayhamānahattho vā aggiṃ pāteti evaṃ ajānantassa anāpatti. Sesaṃ uttānameva.