Vilekhantassa dukkaṭaṃ. Allasiṅgaverādīsupi eseva nayo. Sace pana kappiyaṃ kārāpetvā sītale padese ṭhapitassa mūlaṃ sañjāyati uparibhāge chindituṃ vaṭṭati. Sace aṅkuro jāyati heṭṭhābhāge chindituṃ vaṭṭati. Mūle ca nīlaṅkure ca jāte chindituṃ na vaṭṭati.

Chindati vā chedāpeti vāti antamaso sammajjanīsalākāyapi tiṇāni chindissāmīti bhūmiṃ sammajjanto sayaṃ vā chindati aññena vā chedāpeti. Bhindati vā bhindāpeti vāti antamaso caṅkamantopi chijjanakaṃ chijjatu bhijjanakaṃ bhijjatu caṅkamitaṭṭhānaṃ dassessāmīti sañcicca pādehi akkamanto tiṇavallīādīni sayaṃ vā bhindati aññena vā bhedāpeti. Sacepi tiṇaṃ vā lataṃ vā gaṇṭhiṃ karontassa bhijjati gaṇṭhimpi kātuṃ na vaṭṭati. Tālarukkhādīsu pana corānaṃ anāruhaṇatthāya dārumakkaṭakaṃ ākoṭṭenti kaṇṭake bandhanti. Bhikkhussa evaṃ kātuṃ na vaṭṭati. Sace pana dārumakkaṭako rukkhe allīnamattova hoti rukkhaṃ na pīḷeti vaṭṭati. Rukkhaṃ chinda lataṃ chinda kaṇḍaṃ vā mūlaṃ vā uppāṭehīti vattuṃpi vaṭṭati aniyāmitattā. Niyāmetvā pana imaṃ rukkhaṃ chindāhītiādiṃ vattuṃ na vaṭṭati. Nāmaṃ gaṇhitvāpi ambarukkhaṃ catūrassavalliṃ āluvakaṇḍaṃ muñajatiṇaṃ asukarukkhacchalliṃ chinda bhinda uppāṭehītiādivacanaṃpi aniyāmitameva hoti. Imaṃ ambarukkhanti ādivacanameva hi niyāmitaṃ nāma taṃ na vaṭṭati. Pacati vā pacāpeti vāti antamaso pattampi pacitukāmo tiṇādīnaṃ upari Sañcicca aggiṃ karonto sayaṃ vā pacati aññena vā pacāpetīti sabbaṃ paṭhavīkhananasikkhāpade vuttanayeneva veditabbaṃ. Aniyāmetvā pana mugge paca māse pacātiādiṃ vattuṃ vaṭṭati. Ime mugge paca ime māse pacāti evaṃ vattuṃ na vaṭṭati. Anāpatti imaṃ jānāti ādīsu imaṃ mūlabhesajjaṃ jāna imaṃ mūlaṃ vā paṇṇaṃ vā dehi imaṃ rukkhaṃ vā lataṃ vā āhara iminā pupphena vā phalena vā paṇṇena vā attho imaṃ rukkhaṃ vā lataṃ vā phalaṃ vā kappiyaṃ karohīti evamattho daṭṭhabbo. Ettāvatā bhūtagāmaparimocanaṃ kataṃ hoti. Paribhuñjantena pana bījagāmaparimocanatthaṃ punapi kappiyaṃ kāretabbaṃ.