{471} Tena samayena buddho bhagavāti uddositasikkhāpadaṃ. Tattha santaruttarenāti antaranti antaravāsako vuccati. Uttaranti uttarāsaṅgo. Saha antarena uttaraṃ santaruttaraṃ. Tena santaruttarena. Saha antaravāsakena uttarāsaṅgenāti attho. Kaṇṇakitānīti sedena phuṭṭhokāsesu sañjātakāḷasetamaṇḍalāni. Addasā kho āyasmā ānando senāsanacārikaṃ āhiṇḍantoti thero kira bhagavati divāpaṭisallānatthāya gandhakuṭiṃ paviṭṭhe taṃ okāsaṃ labhitvā dunnikkhittāni dārubhaṇḍamattikābhaṇḍāni paṭisāmento asammaṭṭhaṭṭhānaṃ sammajjanto gilānehi bhikkhūhi saddhiṃ paṭisanthāraṃ karonto tesaṃ bhikkhūnaṃ senāsanaṭṭhānaṃ sampatto addasa. Tena vuttaṃ addasā kho āyasmā ānando senāsanacārikaṃ āhiṇḍantoti.

{473} Avippavāsasammatiṃ dātunti avippavāse sammati avippavāsasammati. Avippavāsāya vā sammati avippavāsasammati. Ko panettha ānisaṃso. Yena cīvarena vippavasati taṃ nissaggiyaṃ na hoti āpattiñca na āpajjati. Kittakaṃ kālaṃ. Mahāsumatthero tāva āha yāva rogo na vūpasamati vūpasante pana roge sīghaṃ cīvaraṭṭhānaṃ āgantabbanti. Mahāpadumatthero āha sīghaṃ āgacchato Rogo paṭikuppeyya tasmā saṇikaṃ āgantabbaṃ yato paṭṭhāya hi satthaṃ vā pariyesati gacchāmīti ābhogaṃ vā karoti tato paṭṭhāya vaṭṭati na dāni gamissāmīti evaṃ pana dhuranikkhepaṃ karontena paccuddharitabbaṃ atirekacīvaraṭṭhāne ṭhassatīti. Sace panassa rogo paṭikuppati kiṃ kātabbanti. Pussadevatthero tāva āha sace soyeva rogo paṭikuppati sāeva sammati puna sammatidānakiccaṃ natthi athañño kuppati puna dātabbā sammatīti. Upatissatthero āha so vā rogo hotu añño vā puna sammatidānakiccaṃ natthīti.

{475-476} Niṭṭhitacīvarasmiṃ bhikkhunāti idha pana purimasikkhāpade viya atthaṃ aggahetvā niṭṭhite cīvarasmiṃ bhikkhunoti evaṃ sāmivasena karaṇavacanassa attho veditabbo. Karaṇavasena hi bhikkhunā idaṃ nāma kātabbanti natthi sāmivasena pana bhikkhuno cīvarasmiṃ niṭṭhite kaṭhine ca ubbhate evaṃ chinnapalibodho ekarattampi ce bhikkhu ticīvarena vippavaseyyāti evaṃ attho yujjati. Tattha ticīvarenāti adhiṭṭhitesu tīsu cīvaresu yenakenaci. Ekena vippavuṭṭhopi hi ticīvarena vippavuṭṭho hoti paṭisiddhapariyāpannena vippavuṭṭhattā. Tenevassa padabhājane saṅghāṭiyā vāti ādi vuttaṃ. Vippavaseyyāti vippavuṭṭho vaseyya.