Paṭikarissantīti ca ahaṃ ayyā ayye pavāremi diṭṭhena vā sutena vā parisaṅkāya vā vadantu maṃ ayyā anukampaṃ upādāya passantī paṭikarissāmīti ca ahaṃ ayya ayyaṃ pavāremi diṭṭhena vā sutena vā parisaṅkāya vā vadatu maṃ ayyo anukampaṃ upādāya passantī paṭikarissāmīti ca evaṃ tikkhattuṃ vattabbaṃ. Mānattacaraṇañca upasampadapariyesanā ca yathāṭhāneyeva āvibhavissati. Na bhikkhuniyā kenaci pariyāyenāti dasahi vā akkosavatthūhi aññena vā kenaci pariyāyena bhikkhu neva akkositabbo na paribhāsitabbo na ca bhayena tajjetabbo. Ovaṭoti pihito vārito paṭikkhitto. Vacanaṃyeva vacanapatho. Anovaṭoti apihito avārito apaṭikkhitto. Tasmā bhikkhuniyā adhipaccaṭṭhāne jeṭṭhakaṭṭhāne ṭhatvā evaṃ abhikkama evaṃ paṭikkama evaṃ nivāsehi evaṃ pārupāhīti kenaci pariyāyena neva bhikkhu ovaditabbo na anusāsitabbo. Dosaṃ pana disvā pubbe mahātherā evaṃ na abhikkamanti na paṭikkamanti na nivāsenti na pārupanti īdisaṃ kāsāvaṃpi na dhārenti na evaṃ akkhīni añjentītiādinā nayena vijjamānadosaṃ dassetuṃ vaṭṭati. Bhikkhūhi pana ayaṃ vuḍḍhasamaṇī evaṃ nivāseti evaṃ pārupati mā evaṃ nivāsehi mā evaṃ pārupāhi mā tilakakammapaṇṇakammādīni karohīti yathāsukhaṃ bhikkhuniṃ ovadituṃ anusāsituṃ vaṭṭati.
Samaggamhayyāti bhaṇantanti samaggā amhā ayyā iti bhaṇantaṃ bhikkhunīsaṅghaṃ. Aññaṃ dhammaṃ bhaṇatīti aññaṃ suttaṃ vā abhidhammaṃ vā. Samaggamhayyāti vacanena hi ovādaṃ paccāsiṃsanti. Tasmā ṭhapetvā ovādaṃ aññaṃ dhammaṃ bhaṇantassa dukkaṭaṃ. Ovādaṃ aniyyādetvāti esa bhaginiyo ovādoti avatvā. {150} Adhammakammeti ādīsu bhikkhunovādakasammatikammaṃ kammanti veditabbaṃ. Tattha adhammakamme dvinnaṃ navakānaṃ vasena aṭṭhārasa pācittiyāni. Dhammakamme dutiyassa navakassa avasānapade anāpatti. Sesesu sattarasa dukkaṭāni. {152} Uddesaṃ dentoti aṭṭhannaṃ garudhammānaṃ pāliṃ uddisanto. Paripucchaṃ dentoti tassāyeva paguṇāya garudhammapāliyā aṭṭhakathaṃ bhaṇantoti attho. Osārehi ayyāti vuccamāno osāretīti evaṃ vuccamāno aṭṭhagarudhammapāliṃ osāretīti attho. Evaṃ uddesaṃ dento paripucchaṃ dento yo ca osārehīti vuccamāno aṭṭhagarudhammaṃ bhaṇati tassa pācittiyena anāpatti. Aññaṃ dhammaṃ bhaṇantassa dukkaṭena anāpatti. Pañhaṃ pucchati pañhaṃ puṭṭho kathetīti bhikkhunī garudhammanissitaṃ vā khandhādinissitaṃ vā pañhaṃ pucchati. Taṃ yo bhikkhu katheti tassāpi anāpatti. Aññassatthāya bhaṇantanti catupparisāya dhammaṃ desentaṃ bhikkhuṃ upasaṅkamitvā bhikkhuniyo suṇanti. Tatrāpi bhikkhussa anāpatti. Sikkhamānāya sāmaṇeriyāti etāsaṃ desentassāpi anāpatti. Sesaṃ uttānatthameva.