Bhikkhu atthaṅgate suriye bhikkhunīupassayaṃ upasaṅkamitvā aṭṭhahi garudhammehi ovadati tīṇi pācittiyāni. Aññena dhammena ovadato dve dukkaṭāni ekaṃ pācittiyaṃ. Kathaṃ. Asammatamūlakaṃ dukkaṭaṃ upassayaṃ gantvā aññena dhammena ovadanamūlakaṃ dukkaṭaṃ atthaṅgate suriye ovadanamūlakaṃ pācittiyanti. Sammatassa atthaṅgate suriye tattha gantvā aṭṭhahi garudhammehi ovadantassa ekā anāpatti dve pācittiyāni. Kathaṃ. Sammatattā anāpatti atthaṅgate suriye ovadanamūlakaṃ ekaṃ gantvā aṭṭhahi garudhammehi ovadanamūlakaṃ ekanti dve pācittiyāni. Tasseva aññena dhammena ovadato ekā anāpatti ekaṃ dukkaṭaṃ ekaṃ pācittiyaṃ. Kathaṃ. Sammatattā anāpatti gantvā aññena dhammena ovadanamūlakaṃ dukkaṭaṃ atthaṅgate suriye ovadanamūlakaṃ pācittiyanti. Divā pana gantvā ovadato sammatassa asammatassa ca rattiṃ ovadanamūlakaṃ ekaṃ pācittiyaṃ apanetvā avasesā āpattānāpattiyo veditabbāti.