{181} Sattamasikkhāpade. Pacchā gacchantīnaṃ corā acchindiṃsūti pacchā gacchantīnaṃ pattacīvaraṃ corā hariṃsu. Dūsesunti tā bhikkhuniyo dūsayiṃsu sīlavināsaṃ pāpayiṃsūti attho. {182-183} Saṃvidhāyāti saṃvidahitvā gamanakāle saṃketaṃ katvāti attho. Kukkuṭasampādeti ettha yasmā gāmā nikkhamitvā kukkuṭo padasāva aññaṃ gāmaṃ gacchati ayaṃ kukakuṭasampādoti vuccati . Tatrāyaṃ vacanattho. Sampadanti etthāti sampādo. Ke sampadanti. Kukkuṭā. Kukkuṭānaṃ sampādo kukkuṭasampādo. Athavā sampādoti gamanaṃ. Kukkuṭānaṃ sampādo ettha atthīti kukkuṭasampādo. Kukkuṭasampāte itipi pāṭho. Tattha yassa gāmassa gehacchadanapiṭṭhito kukkuṭo uppatitvā aññassa gehacchadanapiṭṭhiyaṃ sampatati ayaṃ kukkuṭasampādoti vuccati. Vacanattho panettha vuttanayeneva veditabbo. Dvidhā vuttappakāropi cesa gāmo accāsanno hoti upacāro na labbhati. Yasmiṃ pana gāme paccūsasamaye vasantassa kukkuṭassa saddo anantare gāme suyyati tādisehi gāmehi saṃpuṇṇaraṭṭhe gāmantare gāmantare pācittiyanti aṭṭhakathāyaṃ vuttaṃ. Kiñcāpi vuttaṃ gāmantare gāmantare āpatti pācittiyassāti vacanato pana sacepi ratanamattantaro gāmo hoti yo tassa manussehi Ṭhapitaupacāro taṃ okkamantassa āpattiyeva. Taṃ pāliyā na sameti. Sace āsannābhāvena tathā laddhavohārato evarūpopi gāmo āsannabhāvena kukkuṭasaṃpādoti vā na kukkuṭasaṃpādoti vā vohāraṃ labhati tasmā taṃ na sametīti. Itaresu pana etassa upacāraṃ atikkamitvā aññassa upacārokkamanameva na paññāyati. Tasmā āpattiropanaṭṭhānaṃyeva na dissati. Tatrāyaṃ āpattivinicchayo. Saṃvidahanakāle hi sace ubhopi bhikkhunīupassaye vā antarārāme vā āsanasālāya vā titthiyaseyyāya vā ṭhatvā saṃvidahanti anāpatti. Kappiyabhūmi kirāyaṃ. Tasmā ettha saṃvidahanapaccayā dukkaṭāpattiṃ na vadanti. Gacchantassa yathāvatthukameva. Sace pana antogāme bhikkhunīupassayadvāre rathikāya aññesu vā catukkasīghāṭakahatthisālādīsu saṃvidahanti bhikkhuno āpatti dukkaṭassa. Evaṃ saṃvidahitvā gāmato nikkhamanti. Nikkhamane anāpatti. Anantaragāmassa upacārokkamane pana bhikkhuno pācittiyaṃ. Tatrāpi paṭhamapāde dukkaṭaṃ dutiyapāde pācittiyanti mahāpaccariyaṃ vuttaṃ. Gāmato nikkhamitvā pana yāva anantaragāmassa upacāraṃ na okkamanti etthantare saṃvidahitepi bhikkhuno dukkaṭaṃ. Anantaragāmassa upacārokkamane purimanayeneva anāpatti. Sace dūrataraṃ gantukāmā honti gāmūpacāragaṇanāya okkamane okkamane āpatti. Tassa tassa pana gāmassa atikkamane anāpatti. Sace pana bhikkhunī asukaṃ nāma gāmaṃ gamissāmīti upassayato nikkhamati bhikkhupi tameva gāmaṃ Sandhāya asukaṃ gāmaṃ gamissāmīti vihārato nikkhamati atha dvepi gāmadvāre samāgantvā tumhe kuhiṃ gacchatha asukaṃ gāmannāma tumhe kuhinti mayaṃpi tatthevāti vatvā ehi dāni gacchāmāti saṃvidhāya gacchanti anāpatti. Kasmā. Pubbameva gamissāmīti nikkhantattāti mahāpaccariyaṃ vuttaṃ. Taṃ neva pāliyā na sesaaṭṭhakathāya sameti.