Pādāpi phālitāti yathā mahācammassa parato maṃsaṃ dissati evaṃ phālitā vālikāya vā sakkharāya vā pahatamattā dukkhaṃ uppādenti na sakkā hoti antogāme piṇḍāya carituṃ. Tādise gelaññe gilānasamayoti bhuñjitabbaṃ. Na lesakappiyaṃ kātabbaṃ. Cīvare kariyamāneti yadā sāṭakaṃ ca suttaṃ ca labhitvā cīvaraṃ karonti tadā. Visuṃ hi cīvarakārasamayo nāma natthi. Tasmā yo tattha cīvare kattabbaṃ yaṅkiñci kammaṃ karoti mahāpaccariyaṃ hi antamaso sūcivedhanakotipi vuttaṃ tena cīvarakārasamayoti bhuñjitabbaṃ. Kurundiyaṃ pana vitthāreneva vuttaṃ yo cīvaraṃ vicāreti chindati moghasuttaṃ ṭhapeti āgantukapaṭaṃ ṭhapeti paccāgataṃ sibbeti āgantukapaṭaṃ bandhati anuvātaṃ chindati ghaṭṭeti āropeti tattha paccāgataṃ sibbati suttaṃ karoti valeti pipphalikaṃ niseti parivaṭṭanaṃ karoti sabbopi cīvaraṃ karotiyevāti vuccati yo pana samīpe nisinno jātakaṃ vā dhammapadaṃ vā katheti ayaṃ na cīvarakārako etaṃ ṭhapetvā sesānaṃ gaṇabhojane anāpattīti. Aḍḍhayojananti ettakaṃpi addhānaṃ gantukāmena. Yo pana dūraṃ gantukāmo tattha vattabbameva natthi. Gacchantenāti addhānaṃ gacchantena Aḍḍhayojanabbhantare gāvutepi bhuñjituṃ vaṭṭati. Gatena bhuñjitabbanti gatena ekadivasaṃ bhuñjitabbaṃ. Nāvābhiruhaṇepi eseva nayo. Ayaṃ pana viseso. Abhiruḷhena icchitaṭṭhānaṃ gantvāpi yāva na orohati tāva bhuñjitabbanti mahāpaccariyaṃ vuttaṃ. Catutthe āgateti ayaṃ antimaparicchedo. Catutthepi āgate yattha na yāpenti so mahāsamayo. Yattha pana sataṃ vā sahassaṃ vā sannipatanti tattha vattabbameva natthi. Tasmā tādise kāle mahāsamayoti adhiṭṭhahitvā bhuñjitabbaṃ. Yo koci paribbājakasamāpannoti sahadhammikesu vā titthiyesu vā aññataro. Etesaṃ hi yenakenaci kate bhatte samaṇabhattasamayoti bhuñjitabbaṃ.

{220} Anāpatti samayeti sattasu samayesu aññatarasmiṃ anāpatti. Dve tayo ekatoti yepi akappiyanimantanaṃ sādiyitvā dve vā tayo vā ekato gahetvā bhuñjanti tesaṃpi anāpatti.