Evaṃ asananti ādīsu yañca asati yañca bhojanaṃ hatthapāse ṭhitena abhihaṭaṃ paṭikkhipanto pavāraṇaṃ āpajjati taṃ ñatvā idāni yathā āpajjati tassa jānanatthaṃ ayaṃ vinicchayo. Asanaṃ bhojananti ettha tāva yena ekaṃ siṭṭhaṃpi ajjhohaṭaṃ hoti so sace pattamukhahatthānaṃ yattha katthaci pañcasu bhojanesu ekasmiṃpi sati Aññaṃ pañcasu bhojanesu ekaṃpi paṭikkhipati pavāreti. Katthaci bhojanaṃ natthi āmisagandhamattaṃ paññāyati na pavāreti. Mukhe ca hatthe ca bhojanaṃ natthi patte atthi tasmiṃ pana āsane na bhuñjitukāmo vihāraṃ vā pavisitvā bhuñjitukāmo aññassa vā dātukāmo tasmiṃ ce antare aññataraṃ bhojanaṃ paṭikkhipati na pavāreti. Kasmā. Vippakatabhojanabhāvassa upacchinnattā. Yopi aññattha gantvā bhuñjitukāmo mukhe bhattaṃ gilitvā sesaṃ ādāya gacchanto antarāmagge aññaṃ bhojanaṃ paṭikkhipati tassāpi pavāraṇā na hotīti mahāpaccariyaṃ vuttaṃ. Yathā ca patte evaṃ hatthepi mukhepi vā vijjamānaṃ bhojanaṃ sace anajjhoharitukāmo hoti tasmiṃ ca khaṇe aññaṃ paṭikkhipati na pavāreti. Ekasmiṃ hi pade vuttalakkhaṇaṃ sabbattha veditabbaṃ hoti. Apica kurundiyaṃ esa nayo dassitoyeva. Vuttaṃ hi tattha mukhe bhattaṃ gilitaṃ hatthe bhattaṃ vighāsādassa dātukāmo patte bhattaṃ bhikkhussa dātukāmo sace tasmiṃ khaṇe paṭikkhipati na pavāretīti. Hatthapāse ṭhitoti ettha pana sace bhikkhu nisinno hoti āsanassa pacchimantato paṭṭhāya sace ṭhito pañhiantato paṭṭhāya sace nipanno yena passena nipanno tassa pārimantato paṭṭhāya dāyakassa nisinnassa vā ṭhitassa vā nipannassa vā ṭhapetvā pasāritahatthaṃ yaṃ āsannataraṃ aṅgaṃ tassa orimantena paricchinditvā aḍḍhateyyahattho hatthapāsoti Veditabbo. Tasmiṃ ṭhatvā abhihaṭaṃ paṭikkhipantasseva pavāraṇā hoti na tato paraṃ. Abhiharatīti hatthapāsabbhantare ṭhito gahaṇatthaṃ upanāmeti. Sace pana anantarānisinno bhikkhu hatthe vā urūsu vā ādhārake vā ṭhitaṃ pattaṃ anabhiharitvā va bhattaṃ gaṇhāhīti vadati taṃ paṭikkhipato pavāraṇā natthi. Bhattapacchiṃ ānetvā purato bhūmiyaṃ ṭhapetvā gaṇhāti vuttepi eseva nayo. Īsakaṃ pana uddharitvā vā upanāmetvā vā gaṇhāthāti vutte pana paṭikkhipato pavāraṇā hoti. Therāsane nisinno thero dūre nisinnassa daharabhikkhussa pattaṃ pesetvā ito odanaṃ gaṇhāhīti vadati gaṇhitvā pana gato tuṇhī tiṭṭhati. Daharo alaṃ mayhanti paṭikkhipati na pavāreti. Kasmā. Therassa dūrabhāvato dūtassa ca anabhiharaṇatoti. Sace pana gahetvā āgato bhikkhu imaṃ bhattaṃ gaṇhāti vadati taṃ paṭikkhipato pavāraṇā hoti.